Руската агресивна војна е најголемата закана за мирот и безбедноста во Европа, а помошта на севернокорејските сили за Русија претставува голема ескалација во војната против Украина, заклучија претседателката на Европската комисија Урсула фон дер Лајен и генералниот секретар на НАТО Марк Руте.
„Руската агресивна војна на европско тло е најголемата единствена закана за мирот и безбедноста на европскиот континент“, се вели во заедничката изјава по првата средба меѓу Фон дер Лајен и Руте, кој неодамна ја презеде функцијата генерален секретар на НАТО. И двајцата се согласуваат дека „распоредувањето на севернокорејските трупи за поддршка на руската агресивна војна претставува значајна ескалација на војната против Украина, како и сериозна закана за европската безбедност и глобалниот мир“.
На нивната прва средба беше договорено формирање на работна група на високо ниво за зајакнување на постојната соработка меѓу ЕУ и НАТО. Руте и Фон дер Лајен исто така разговараа за зголемената самоувереност на авторитарните држави на светската сцена. „Овие држави ги доведуваат во прашање нашите заеднички интереси, вредности и демократски принципи, користејќи сè повеќе средства – политички, економски, технолошки и воени“, истакнуваат Руте и Фон дер Лајен.
