Игор Џамбазов има уште една причина повеќе да го нарекува Дојран свој дом. Актерот, музичар и шоумен доби признание од Општина Дојран за промоција на градот и Дојранското Езеро, а во свој стил, со доза хумор и многу емоции, најави дека сака и официјално да стане жител на ова место.
Признанието му беше врачено на свечената седница одржана во Градскиот парк во Нов Дојран, во рамките на одбележувањето на 5 Ноември – Денот на ослободувањето на Дојран. Годинава се навршуваат 82 години од ослободувањето на градот во 1944 година.
Со ова признание, Советот на Општината и градоначалникот Илија Тентов му оддадоа благодарност за неговиот придонес во промоцијата на Дојран и езерото.
„Дојран е мојата последна животна станица“
Џамбазов не ја крие приврзаноста кон Дојран. За него, ова место одамна е многу повеќе од дестинација за одмор – тоа е простор каде што пронашол спокој, радост и чувство на припадност.
Дојран е мојот мир, мојата среќа, мојата гордост и мојата последна животна станица“, напиша тој во објавата на Инстаграм, споделувајќи ја веста за признанието.
Но во неговата емотивна порака има место и за уште една посебна љубов. Џамбазов откри дека Дојран му ја подарил и Ферхунде, неговата верна четириножна пријателка, која очигледно има посебно место во неговиот живот.
Поврзани објави
Од признание до дојранска лична карта
Како што доликува на неговиот препознатлив дух, Џамбазов не пропушти да ја зачини објавата со шега. Тој најави дека веќе следниот ден ќе поднесе барање до Општината за жителство и ќе побара дојранска лична карта.
Благодарност до Советот на Општината и градоначалникот Илија Тентов, како и на сите мои драги дојранчани… Народе, елајте уф Дојран!!!“, порача актерот.
Неговата објава уште еднаш потврди дека Дојран има посебно место во неговото срце. А дали навистина ќе го направи следниот чекор и официјално ќе се пресели таму, останува да видиме. Засега, едно е сигурно – Џамбазов има силна причина да му се враќа на градот покрај езерото.
Фото: Фејсбук, Инстаграм
