Table of Contents
Ако почувствувате глад пред спиење, не мора да си легнете со празен стомак. Важно е да изберете лесен, избалансиран оброк што ќе ве засити без непотребно да го оптовари варењето.
Многумина веруваат дека јадењето непосредно пред спиење е лоша навика што негативно влијае врз телесната тежина и здравјето. Сепак, нутриционистите објаснуваат дека не е секој доцен оброк лош избор. Најдобро е да содржи протеини и сложени јаглехидрати, по можност од намирници богати со растителни влакна. Нутриционистката Лорен Твиг истакнува дека таквата комбинација може да помогне во внесувањето важни хранливи материи што можеби недостигале во текот на денот.
Три едноставни идеи за вечерен оброк
1. Банана со путер од кикиритки. Бананата содржи јаглехидрати, влакна, калиум и магнезиум, додека путерот од кикиритки обезбедува протеини и незаситени масти. Втора добра можност е свежо сирење со јаболко. Половина шолја свежо сирење и едно помало јаболко обезбедуваат комбинација од протеини, јаглехидрати и влакна. За оние што претпочитаат солен оброк, нутриционистката Џулија Зумпано од клиниката „Кливленд“ препорачува парче интегрален леб со едно јајце и лажица изгмечено авокадо.
Глад или само навика?
Поврзани објави
Пред да посегнете по храна, размислете дали навистина сте гладни или јадете од досада, стрес или замор. Физичкиот глад често се препознава по празнина во желудникот, кркорење или недостиг на енергија. Од друга страна, желбата за грицки може да се појави и веднаш по оброкот, особено кога храната е начин за опуштање. Нутриционистката Мишел Раутенстајн нагласува дека целта на вечерниот меѓуоброк е да го смири гладот, а не да биде уште една целосна вечера. Оброк од околу 200 калории може да послужи како ориентација, но потребите се разликуваат од човек до човек.
Што да избегнувате пред спиење?
Големите количества чипс, слатки, печива и сладолед не се најдобриот избор, бидејќи често содржат многу шеќер, сол или заситени масти, а малку протеини и влакна. Може да не ве заситат долго, а понекогаш и да предизвикаат дигестивни тегоби. Луѓето што имаат киселини или гастроезофагеален рефлукс треба да бидат особено внимателни и да го изедат последниот оброк најмалку три часа пред легнување. Истото временско растојание може да помогне во ублажувањето на ноќните симптоми на рефлукс.
Вечерниот оброк не е неопходен за секого, ниту е универзално решение за одржување стабилно ниво на шеќер во крвта. Луѓето со дијабетес, особено оние што користат инсулин или лекови што можат да предизвикаат хипогликемија, треба да се советуваат со лекар за тоа дали им е потребна храна пред спиење. Заклучокот е едноставен: ако навистина сте гладни, мал и избалансиран оброк е разумен избор. Поважни се количината и квалитетот на храната отколку строгото правило да не се јаде по одреден час.
pexels
