Европа се подготвува за новата грејна сезона со значително пониски резерви на природен гас од вообичаеното, што веќе предизвикува раст на цените на енергенсот.
Складиштата во Европа се пополнети околу 63 проценти, додека референтната цена на гасот на берзата TTF надмина 66 евра за мегават-час. За споредба, на почетокот на годината цената беше околу 29 евра.
Особено загрижува состојбата во Германија и Холандија, каде резервите се значително под вообичаеното сезонско ниво. Аналитичарите предупредуваат дека слично ниски залихи последен пат биле забележани во 2021 година, пред големата европска енергетска криза.
Дополнителен ризик претставуваат геополитичките тензии и можните проблеми со транспортот на течен природен гас, што би можело дополнително да ја зголеми конкуренцијата меѓу Европа и азиските пазари.
Доколку зимата биде постудена од очекуваното, побарувачката може нагло да се зголеми. Дел од аналитичарите не ја исклучуваат можноста цената на гасот во декември да надмине 100 евра за мегават-час.
Нов раст на цените би можел да се одрази и врз сметките за греење и трошоците на индустријата, особено во земјите кои во голема мера зависат од увоз на природен гас.
За Македонија, ризикот е особено значаен поради зависноста од увозот и движењето на европските берзански цени, што може да влијае врз трошоците за централното греење и работењето на компаниите кои користат гас.
