Кинеските автомобилски компании сè посилно го прошируваат своето присуство на европскиот пазар, не само преку продажба, туку и преку отворање и користење производствени капацитети во земјите од Европската Унија.
Според актуелните проекции, производството на автомобили од кинески брендови во Европа би можело до 2030 година да достигне околу еден милион возила годишно, а пет години подоцна да се зголеми на 1,5 милиони автомобили годишно.
Трендот веќе е видлив. Кинеските компании како BYD, Leapmotor и Chery инвестираат во европски фабрики и воспоставуваат партнерства со локални производители. Проценките покажуваат дека само годинава во европските погони би можеле да бидат произведени околу 90.000 возила од кинески марки.
Брзото ширење на кинеските производители ги поттикнува европските институции да бараат нов модел на производство. Целта е фабриките во Европа да не се користат само за склопување автомобили од компоненти произведени во Кина.
Европската Унија разгледува мерки со кои би се поттикнало користењето европски компоненти и добавувачи. Во рамките на најавениот Industrial Accelerator Act се разгледува можноста за воведување минимален удел на компоненти произведени во Европа за возилата што се произведуваат на европска територија.
На тој начин Брисел сака да го зајакне европскиот синџир на снабдување, да отвори дополнителни работни места и да ја намали зависноста од увозот на делови и материјали од Кина.
Меѓу земјите кои стануваат важни производствени центри за кинеските автомобилски компании се издвојуваат Шпанија и Унгарија.
BYD планира производство во Унгарија, а компанијата истовремено ја разгледува и Шпанија како локација за дополнителен производствен капацитет. Во Шпанија веќе се произведуваат возила на брендовите Omoda и Jaecoo, додека Leapmotor планира производство на електрични автомобили во фабриката на Stellantis во Сарагоса.
Дополнително, кинескиот производител Geely ќе биде присутен во шпанскиот производствен сектор преку партнерство со Ford во Валенсија.
