Студентите кои ги блокираат факултетите во Србија, преку својот службен профил на социјалните мрежи, потврдија дека на 1-ви септември ќе се придружат на средношколците во големиот протест кој беше најавен пред неколку дена.
Младите од средните училишта кои протестираат во повеќе градови низ Србија, го објавија претстојниот протест за 1-ви септември со пораката: „Средношколците се сеќаваат – сите сме под настрешница“.
Според извештаите на српските медиуми, на првиот ден од новата учебна година, со поддршка од родителите, дел од професорите, како и од учениците кои протестираат, матурантите ќе организираат комеморативен марш во чест на 10-месечнината од падот на бетонската настрешница на железничката станица во Нови Сад. Исто така, во некои училишта беше побарано од директорите тој ден да биде прогласен за неработен за сите, освен за свечениот прием на првачињата.
Студентите кои протестираат денес го потврдија своето присуство на протестот на средношколците. „Нема да заборавиме. Ќе се видиме под настрешницата“, напишаа студентите во објава на Инстаграм.
