Американскиот тајкун Илон Маск ги поттикна сите држави членки на ЕУ, вклучувајќи ја и Ирска, да го напуштат блокот, обвинувајќи ја ЕУ за “уништување на демократијата на континентот”.
Преку порака на социјалните мрежи, Маск директно ја поддржа таканаречената иницијатива ИРЕГЗИТ (IREXIT) – излегување на Ирска од ЕУ – како одговор на пресудата на Судот на правдата на ЕУ со која ѝ беше наредено на Ирска да обезбеди сместување за барателите на азил, и покрај противењето на ирските судови.
“Ирска треба да ја напушти ЕУ. Сите земји треба да го сторат тоа, според мене. Европската унија ја уништува демократијата во Европа”, рече Маск во објавата.
Ова мислење се појави после критиките кон ЕУ од страна на корисникот Мајкл О’Киф, кој тврдеше дека Европската унија “ја мрази демократијата” и нема право да се меша во националните судски одлуки.
Ова не е првпат Маск остро да го критикува Брисел. Во претходни изјави, тој ја обвини Европската комисија дека му понудила “нелегален договор” во врска со цензурата на содржината на платформата “X”, со што, според него, тој не се согласил.
“Доколку тивко цензуриравме одредени изјави, немаше да бидеме казнети. Другите платформи се согласија со тој договор. „X“ не се согласи”, рече Маск.
Тој континуирано предупредуваше дека Европа е “на работ на истребување” поради драстично ниската стапка на раѓање, апелирајќи за фундаментални промени за да се избегне “сопствениот крај” на континентот. Тој ја опиша Европа како регион на “широко распространет песимизам”, каде што голем број луѓе повеќе не веруваат во иднината.
Во пресрет на претстојните германски избори, Маск отворено ја поддржа Алис Вајдел, кандидатка на десничарската Алтернатива за Германија (АфД), во објава во која ги повика Европејците да се приклучат на движењето “Да ја направиме Европа повторно голема”.
“Луѓе на Европа: Придружете се на МЕГА движењето! Да ја направиме Европа повторно голема!!”, напиша Маск. Оваа поддршка предизвика бурни реакции од европските претставници.
Поранешниот германски канцелар Олаф Шолц остро ги осуди ставовите на Маск, нарекувајќи ја неговата поддршка за АфД “одвратна”. “Огорчен сум што Маск ја поддржува крајната десница и не реагира соодветно на страдањето на Евреите и другите народи во Европа од рацете на Германците во минатото. Неговите изјави ја оштетуваат демократијата низ цела ЕУ”, рече Шолц.
Коментирајќи ги ставовите на Маск, потпретседателот на САД, Џеј Ди Венс, застана во негова одбрана. Тој иронично ја спореди европската реакција на Маск со американската толеранција кон објавите на Грета Тунберг.
“Ако можевме да издржиме една деценија објави на Грета, сигурно можеме да издржиме неколку месеци на Маск. Демократијата значи дека гласот на граѓаните не може да биде замолчен”, заклучи Венс.
мс/фото: ЕПА архива.
