Александра Наќева Ружин е назначена за нов лидер на Советот на амбасадори.
Во официјалното известување од Советот на амбасадори се наведува дека се очекува Наќева Ружин да продолжи со активната и значајна улога на Советот во надворешната политика, давајќи важен придонес во јавната дискусија и во оформувањето на стратешките дебати поврзани со меѓународната позиција на државата.
Нејзиното назначување се случи на редовното годишно Собрание на организацијата. Заедно со Наќева Ружин, за заменик-претседатели на амбасадорскиот совет се избрани амбасадорите Азис Положани и Зоран Јолевски.
Од Извршниот одбор на Советот на амбасадори објавија дека во Извршниот одбор се избрани и амбасадорите Ѓорѓи Филипов, Мухамед Халили, Љупчо Арсовски, Нано Ружин, Елеонора Петрова-Митевска и Тихомир Илиевски, а за главен координатор е назначен амбасадорот Ивица Боцевски.
Членовите на Советот ги разгледаа резултатите од нивната работа по презентацијата на Годишниот извештај од досегашниот лидер, амбасадорот Ѓорѓи Филипов, кому му беше изразена благодарност за неговата посветеност и залагање во текот на изминатиот двегодишен мандат.
На Собранието беше заклучено дека Советот на амбасадори ја задржува својата активна и важна улога во надворешната политика, давајќи значаен придонес во јавната дискусија и во обликувањето на стратешките дебати поврзани со меѓународната позиција на државата.
“Моделот на функционирање на Советот и постигнатите резултати ја потврдуваат неговата посветеност на стратешките државни интереси, без разлика на политичките или етничките разлики меѓу членовите — принцип кој може да служи како позитивен пример за слични организации во земјата и регионот,” порачуваат од Советот на амбасадори.
Новата претседателка на Советот на амбасадори, Наќева Ружин, е експерт во областа на јавните и корпоративните финансии и поранешна амбасадорка со повеќе од 25 години успешна кариера во Министерството за финансии, дипломатијата, академската сфера, меѓународните финансиски институции и корпоративниот финансиски сектор.
Покрај функцијата амбасадор во Кралството Шведска, таа извршувала важни извршни и советодавни функции во државата, меѓу кои: државен и специјален советник во Министерството за финансии и во Град Скопје, генерален директор и финансиски директор на финансиска институција, национален координатор на Платформата за учење од далечина и координатор на пензиската реформа, а работела и како консултант на Европската комисија, Светската банка, Шведскиот институт и Меѓународната телекомуникациска унија.
Имала клучна улога во преговарачкиот скрининг процес со ЕУ во економските области, вклучувајќи го поглавјето за оданочување и областите за управување со јавните финансии и економски критериуми.
Била претседател на Европската бизнис асоцијација и член на управните одбори на Стопанската комора на Македонија, Претседателството на Постојаниот суд за арбитража, Советот на странски инвеститори, Фондот за осигурување на депозити и Националното биро за осигурување.
Пред да биде избрана за претседател, таа ја извршуваше функцијата генерален секретар на Советот на амбасадори.
Наќева Ружин е доктор по економски науки и магистер по јавни политики и менаџмент (Summa Cum Laude) од Универзитетот во Питсбург, САД.
Предавала јавни финансии и индустриска организација на Универзитетот Американ Колеџ Скопје, а била и гостин предавач на Универзитетот во Лидс, Стокхолмската бизнис школа, Универзитетот во Питсбург и Економскиот факултет во Скопје.
Автор е на повеќе трудови во областа на фискалната политика, децентрализацијата и дигиталното образование, и е добитничка на повеќе признанија во Македонија и во странство, вклучително и меѓународната награда на Универзитетот во Питсбург за 2016 година.
вг/са/фото: Александра Наќева Ружин .
