Специјалното обвинителство против корупција и организиран криминал (СПАК) на Албанија ќе набави софистицирана опрема за прислушување и надзор, во вредност од над милион евра.
Според објавата на официјалната веб-страница, покрај редовните оперативни трошоци, впечатливо е што една четвртина од вкупниот буџет ќе биде насочена кон набавка на оваа специјализирана опрема.
Согласно официјалните податоци, СПАК планира да потроши вкупно три милиони евра за инвестиции во текот на оваа година, од кои 1.104.994 евра се наменети исклучиво за набавка на посебната опрема.
„СПАК го користи прислушувањето и следењето како начин за справување со корупцијата и организираниот криминал. Во меѓувреме, методот што ја алармира политиката е запленувањето мобилни телефони. СПАК запленува стотици телефони секоја година и, благодарение на пораките или разговорите пронајдени таму, доаѓа до докази.“
„Но, фактот дека ќе се купи нова опрема за прислушување, следење и слично, покажува дека СПАК се подготвува за други сензационални напади“, наведува „Памфлети“.
Иако ова е последната година од мандатот на Алтин Думани како прв човек на СПАК, тој, како што се чини, прави напори да обезбеди институцијата да го заврши процесот на опремување и обнова на својата зграда и на Националното биро за истраги.
Думани беше избран за главен обвинител на СПАК во средината на декември 2022 година, со тригодишен мандат, при што најави поагресивен пристап во борбата против корупцијата на функционери на сите нивоа, што и активно го спроведува.
Поради заканите кои ги добиваше, од август минатата година се спроведуваат засилени мерки за негова безбедност. Тој користи блиндирано возило, а во близина на неговиот дом е распоредена зајакната полициска единица, која го обезбедува просторот каде што живее, во населбата „Комитети“, која е надгледувана и со дронови.
