Table of Contents
Тројцата добро познати скопски ликови од „Куку Леле“ гостуваа кај Снеже Велков и со своите приказни нè вратија во времето кога се излегуваше речиси секоја вечер, а младоста се живееше поинаку. Камењар, Пеџа и Панки не пропуштија ниту да се пошегуваат на сопствена сметка.
Има луѓе и приказни што веднаш нè враќаат во некое друго време. Во Скопје во кое ноќните излегувања беа дел од секојдневието, кога друштвото се собираше без многу договарање, а спомените од младоста се раскажуваа со смеа и по некоја добро позната анегдота.
Токму таква атмосфера донесоа Владимир Ристов – Камењар, Предраг Васиљевиќ – Пеџа и Сашо Каимовски – Панки, познати по „Куку Леле“, во емисијата „Нешто конкретно“ на Снеже Велков.
Тројцата скопски мангупи, кои денес се семејни луѓе и родители, се потсетија на времето кога младоста имала поинаков ритам, а излегувањата не биле резервирани само за петок и сабота.
„Девојките со вкус ме сакаа мене“
Пеџа уште на почетокот покажа дека не ја изгубил препознатливата духовитост. Кога станало збор за тоа кој бил најголемиот заводник во друштвото, тој без двоумење се пошегувал:
Девојките што имаа вкус ме сакаа мене, тие што немаа – ги сакаа Камењар и Панки“.
Но, освен шегите за љубовните успеси, тројцата се присетија и на навиките од младоста. Пеџа раскажа дека тогаш се излегувало речиси секој ден, од понеделник до петок, а не само за време на викендите.
Ако ловиш риба еден ден, ќе фатиш едно рипче, ако ловиш секој ден – ќе фатиш повеќе“, објасни тој низ смеа.
Како Панки го добил прекарот?
Во разговорот се отвори и прашањето за прекарите по кои публиката ги препознава. Панки откри дека неговиот прекар потекнува од училишните денови, кога бил панкер и се облекувал во согласност со тогашната музичка и модна субкултура.
Токму облеката била причината соучениците да почнат да го нарекуваат Панки – прекар што останал со него и до денес.
Камењар, тангите и сребреното триаголниче
Една од најсмешните случки во емисијата се случила кога Снеже Велков ги прашала дали девојките им подарувале нешто во младоста.
Поврзани објави
Камењар потврдил дека добивале подароци, па набројал: маички, парфеми, облека и долна облека.
Тогаш Пеџа го прекинал со забелешката дека на Камењар му купувале и танги.
На прашањето дали навистина пробал да носи таков подарок, Камењар одговорил со анегдота што ги насмеала присутните:
Еднаш имам пробано и си викам: ‘Ова како ги носат, Боже мили’“.
Пеџа веднаш продолжил со шега дека веројатно ги облекол обратно, а Камењар се надоврзал дека кога видел како изгледаат, веднаш ги соблекол и решил да не експериментира повеќе.
Особено комичен бил и неговиот опис на моделот – со сребрено триаголниче одзади, кое, според него, било повеќе наменето за настап на шипка отколку за секојдневно носење.
Со ваквите приказни Камењар, Пеџа и Панки уште еднаш покажаа дека не им недостигаат ниту хуморот ниту спомените. А за оние што го паметат старото Скопје, нивното гостување беше вистинска мала временска машина – потсетник на едно поинакво време, на младоста и на луѓето што оставиле свој белег во градскиот ноќен живот.
Видео: Youtube
