Во Високиот суд во Белград вчера беше одложено судењето на сопственикот на актерското училиште, Мирослав Алексиќ, обвинет за силување и сексуално вознемирување на неколку ученички на тоа училиште, драмското студио „Ствар срца“.
Судењето е одложено поради здравствената состојба на обвинетиот кој не присуствувал на истото. Неговиот адвокат Зоран Јаковљевиќ пред судијата навел дека состојбата на Алексиќ се влошила откако таткото на актерката Милена Радуловиќ, како што тврди, „физички ја нападнал“ неговата сопруга.
На ова тврдење публиката бурно реагирала, поради што судијата ги опоменал, а Јаковљевиќ им рекол на тоа „многу сте храбри во толпата“.
Судијата наредил, со оглед на тоа што Алексиќ почнал да прима хемотерапија, да се дополни вештачењето за да се утврди дали е способен да присуствува и да го следи судењето.
Претходното судење, кое се одржало во петокот, кратко траело, бидејќи исто така било одложено поради здравствената состојба на Алексиќ.
Поврзани објави
Алексиќ е обвинет за четири кривични дела силување, од кои две се во продолжено траење и пет кривични дела сексуално вознемирување, од кои две се исто така квалификувани во продолжено траење.
Српската актерка Милена Радуловиќ прва го пријави за сексуално злоставување, а набрзо кон обвинувањата против него се придружиле и Ива Илинчиќ и други девојки.
Инаку, на вчерашното рочиште дошла и Милена Радуловиќ.
Алексиќ беше уапсен на 16 јануари 2021 година и до 10 септември беше во притвор, кој потоа му беше заменет со куќен притвор со електронски надзор, по што на 10 март му беше укинат куќниот притвор.
Фото: Инстаграм Принтскрин @mileenaradulovic https://www.instagram.com/mileena_radulovic/
