Најдобриот тенисер на планетата Новак Ѓоковиќ доминантно се пласираше во своето 13-то полуфинале на УС Опен, откако во три сета со 6:1, 6:4, 6:4 го совлада Американецот Тејлор Фриц. Тоа е осма победа на Ноле над Фриц во исто толку натпревари. Следен ривал на Србинот ќе биде победникот од американскиот дуел Бен Шелтон – Френсис Тиафо, кој се игра подоцна вечерва.
Новак го продолжи својот „терор“ врз Американецот, на кој му се разви сериозен комплекс. Ниту во осмиот дуел не му даде шанса на кој било начин да му се закани среде неговиот Њујорк, пред армија домашни навивачи.
Новак изгледаше импресивно уште од самиот почеток во четвртфиналето на последниот Грен слем во годината. Тој лесно го доби воведниот гем на свој сервис, по што следеше ревија на брејкови, а 36-годишниот Србин беше на чело.
