Дознајте како се приготвува вистинска запршка за грав
Добриот грав не зависи само од квалитетот на зрното и начинот на готвење, туку и од запршката која му ги дава препознатливата густина, боја и мирис. Вистинска домашна запршка се приготвува од неколку едноставни состојки, но важно е да се погоди мерката и да се внимава да не загори брашното. Токму тој завршен чекор ја прави разликата помеѓу реткиот грав и оној традиционалниот, густ и вкусен, каков што некогаш се готвел во домовите.
Состојки:
- 2 лажици масло или маст
- 1 рамна лажица брашно
- 1 лажиче мелена слатка пиперка
- 1 чешне лук, ситно сечкано (по желба)
- 100 мл ладна вода или малку течност од гравот
Приготвување:
Поврзани објави
Во помало тенџере сипете масло или маст и загрејте го на умерена температура. Додајте брашно и непрекинато мешајте неколку минути, додека добие благо златна боја. Важно е брашното да не потемни премногу, бидејќи запршката би можела да добие горчлив вкус.
Тргнете го тенџерето од рингла, па додајте мелена слатка пиперка. Ако сакате поинтензивен мирис, додајте и ситно сечкан лук, но внимавајте да не загори.
Потоа, постепено долевајте ладна вода или малку течност од гравот, со постојано мешање за да не се направат грутки. Кога ќе добиете изедначена, мазна смеса, вратете ја кратко на шпорет и промешајте.
Приготвената запршка полека сипете ја во сварениот грав, со постојано мешање. Оставете сето тоа заедно да крчка уште десетина минути на тивок оган за да се соединат вкусовите, а јадењето да ја добие потребната густина.
Мал трик на искусните домаќинки: Запршката секогаш додавајте ја постепено, а не одеднаш. Така полесно ќе ја контролирате густината на гравот. Ако користите маст наместо масло, ќе добиете уште пополн, традиционален вкус.
