Некогаш беше еден од препознатливите гласови на домашната музичка сцена, а потоа одлучи да го напушти животот што го градеше во Македонија и да започне одново преку океанот. Ристе Тевдоски, поранешниот фронтмен на „Браво бенд“, денес зад себе има приказна исполнета со големи промени, храбри одлуки и искуства што ретко се поврзуваат со животот на еден пејач.
Кога неговата музичка кариера почна да се развива, а тој сè повеќе да се пробива и како соло-изведувач, Тевдоски донесе неочекувана одлука – да ја напушти Македонија и да се пресели во САД. Зад себе остави настапи, песни, публика и музички планови, а пред себе имаше нов почеток во сосема поинаква средина.
Неговиот нов дом стана Детроит, во сојузната држава Мичиген. Таму не се откажа од образованието и се запиша на постдипломски студии, но високите трошоци го соочија со потребата да најде начин сам да ги финансира. Решението било далеку од музичките сцени и рефлекторите – почнал да вози камион за да заработи и да ги плати студиите.
Така, човекот што публиката го паметеше како пејач и фронтмен се најде зад воланот на големо товарно возило, со сосема поинакво секојдневие и предизвици. Денес, како што раскажува, на тоа искуство гледа со задоволство, но и како на важна животна лекција што му донела нова перспектива.
По 15 години поминати во Америка, градејќи живот и остварувајќи ги своите планови, Ристе повторно размислува за Македонија. Овојпат, неговата желба е да се врати во татковината.
Што се случувало со неговата кариера по заминувањето, како изгледал животот во Детроит, зошто се одлучил да вози камион и што го поттикнало повторно да размислува за враќање дома?
За сите овие детали зборува во најновото издание на поткастот „Марија во Америка“.
Видео: Youtube
