Изборната листа „Студентска листа – Студентите победуваат“ освои апсолутно мнозинство на предвремените парламентарни избори во Србија и ја прекина 14-годишната власт на Српската напредна партија (СНС), покажуваат конечните проекции на Центарот за слободни избори и демократија (ЦеСИД) и агенцијата Ипсос врз основа на обработени 96 отсто од примерокот.
Според овие податоци, победи Студентската листа со 52,9 отсто од гласовите или 140 пратенички мандати, додека листата „Александар Вучиќ – Обединета Србија“ освои 38,8 отсто од гласовите, односно 103 мандати.
Под изборниот праг остана листата „Ивица Дачиќ – Фактор на стабилност“ со 2,2 отсто, додека сите останати листи освоија помалку од еден отсто, меѓу кои и „Европска Србија“ и „Автентична десница“. Од малцинските листи, во парламентот ќе влезат Сојузот на војводинските Унгарци (СВМ) со три мандати, Албанската коалиција со два мандати, како и СДА Санџак – Чувари на Санџак и Расим Љајиќ – Човечки со по еден мандат.
Александар Вучиќ ги загуби изборите од политичко движење кое пред две години воопшто не постоеше, а произлезе од протестите по трагедијата во Нови Сад, кога при пад на настрешница загинаа 16 луѓе.
Студентската листа нема еден доминантен политички лидер, а меѓу нејзините 250 кандидати има лекари, универзитетски професори, правници, економисти, актери, спортисти и активисти, од кои повеќето никогаш не извршувале високи државни функции. Меѓу попознатите имиња се кошаркарската легенда Дејан Бодирога, поранешниот гувернер Дејан Шошкиќ, актерот Тихомир Станиќ и социологот Јово Бакиќ. Носител на листата е новосадскиот кардиолог и професор на Медицинскиот факултет, Илија Срдановиќ.
Но, првото место на изборната листа не значи и кандидатура за претседател на владата. Позицијата на Срдановиќ не значи автоматски дека тој ќе стане премиер, а движењето сè уште нема потврдено кој ќе ја предводи идната влада. Една од особеностите е што студентите кои ги организираа протестите главно не се поставија на најистакнатите места, туку во текот на повеќе од една година студентски пленуми, блокади и разговори избираа кандидати за кои сметаа дека можат да преземат одговорност за институциите.
Студентската листа формално беше основана во септември од група од 14 лица, главно универзитетски професори, меѓу кои и Марија Маруна, професорка на Архитектонскиот факултет во Белград. Движењето собра повеќе од 70.000 потписи и ја поднесе листата до Републичката изборна комисија на 14 септември, со основна идеја да се изгради политичка опција која нема да зависи од еден лидер.
Тогаш, Студентската листа претстави програма од 11 точки поделена во три целини: „Србија или мафија“, „Во знаењето е моќта“ и „Србија расте со нас“. Во средиштето на програмата се борбата против корупцијата, зајакнувањето на независноста на институциите и одговорноста на функционерите. Тие предвидуваат формирање посебна полициска служба за обвинителството, проверка на работата на МВР, испитување на потеклото на имотот и лустрација со забрана за вршење јавни функции за прекршителите. Меѓу социјалните мерки ги истакнуваат бесплатните учебници, поевтините лекови и поголемите инвестиции во образованието, чие спроведување ќе зависи од идната влада и институционалните постапки.
Post Views: 11
