Table of Contents
Во новите мемоари холивудската ѕвезда за првпат отворено зборува за аферата со Кејтлин Тарнер, бројните љубовни врски пред Кетрин Зита Џонс и условот што му го поставила идната сопруга.
Мајкл Даглас по речиси четири децении откри што навистина се случувало зад камерите за време на снимањето на филмот Romancing the Stone.
Во новите мемоари One Helluva Ride, актерот признал дека во 1984 година имал афера со својата колешка Кејтлин Тарнер, иако двајцата со години ја негирале врската. Во тоа време Даглас бил во брак со Диандра Лукер, но нивниот однос, според неговото сведоштво, веќе бил сериозно нарушен.
Тој раскажал дека со Тарнер најпрво се зближиле како пријатели и колеги. Додека работеле на филмот во Мексико, меѓу нив се развила привлечност која на крајот прераснала во љубовна врска. Нивната блискост не останала незабележана. Диандра почнала да се сомнева дека меѓу сопругот и актерката има нешто повеќе од професионален однос, па отпатувала во Мексико.
Тајна што ја чувале 40 години
Гласините за врската меѓу Даглас и Тарнер се појавиле уште во времето на снимањето, но двајцата решиле да ги демантираат. Во јавноста признавале дека меѓу нив имало хемија и флерт, но тврделе дека никогаш не станале љубовници.
Сега Даглас открил дека таа приказна била измислена за да го заштити неговото семејство. Со Тарнер, според неговите мемоари, се договориле да молчат и никогаш да не зборуваат за аферата. Договорот го почитувале цели четири децении.
Кетрин му поставила јасен услов
Бурниот љубовен живот на Даглас продолжил уште извесно време, сè додека во неговиот живот не се појавила Кетрин Зeта Џонс. Кога почнале да се зближуваат, актерката била јасна дека не сака врска во која ќе има други жени. Ако сакал да биде со неа, морал да се определи за моногамија.
Поврзани објави
Даглас раскажал дека тогаш направил неколку телефонски повици и ги прекинал останатите романтични врски. Двојката се венчала во 2000 година и оттогаш го градела својот заеднички живот под постојан интерес на јавноста.
Години на гласини за „зависност од секс“
Во мемоарите актерот се осврнал и на тврдењата дека во 1990-тите побарал помош поради наводна зависност од секс.
Даглас ја отфрлил таа верзија и нагласил дека не сметал оти неговиот љубовен живот бил резултат на таков проблем.
Во едно постаро интервју, на прашањето зошто бил со толку многу жени, тој одговорил дека не гледал на работите на тој начин и се опишал себеси како „продукт на шеесеттите“.
Отворено за грешките од минатото
Признанијата во книгата доаѓаат од човек кој денес на своето минато гледа со значително поголема дистанца. Даглас не го крие фактот дека правел грешки, но истовремено зборува со почит за животот што го изградил со Кетрин.
Актерот и неговата сопруга се во брак повеќе од две децении, а тој открил дека Кетрин сè уште не ги прочитала мемоарите и засега не коментирала за неговите признанија.
По 40 години молк, Даглас конечно ја ставил на хартија приказната што долго време ја чувал далеку од јавноста – за аферата со Кејтлин Тарнер, годините на љубовни авантури и моментот кога Кетрин му дала причина да го промени начинот на кој живеел.
