Table of Contents
Љубовниот живот на Ралф Фајнс со години ја шокира јавноста.
Тој е еден од најценетите британски актери, маестрален во улоги од „Шиндлеровата листа“ до Лорд Волдемор, но приватниот живот на Ралф Фајнс со години го следат љубовни приказни, прељуби и скандали.
Кога ќе се спомене Ралф Фајнс, пред очи на публиката најчесто се појавуваат незаборавни филмски ликови – од суровиот Амoн Гет во „Шиндлеровата листа“ до еден од најпознатите негативци во филмскиот серијал за Хари Потер.
Но, зад камерата приказната е многу поинаква.
Актерот, кој повеќе од три децении е присутен на светската филмска сцена, отсекогаш бил мошне воздржан кога станува збор за приватноста. Сепак, неговиот љубовен живот во одредени периоди успевал да стане поголема тема во медиумите од неговите филмски улоги.
И една од најпознатите приказни започнала со неговиот брак.
Бракот траел само четири години
Фајнс во 1993 година се оженил со актерката Алекс Кингстон, со која се запознал додека двајцата студирале во Лондон. Нивната врска траела со години, но бракот не успеал да го издржи притисокот на новата љубов во животот на актерот. Само четири години по венчавката, нивниот брак завршил со развод. Причината за крајот на заедничкиот живот била неговата врска со актерката Франческа Анис. А токму оваа романса предизвикала огромно внимание поради разликата во годините.
Анис била дури 18 години постара од Фајнс.
Двајцата се запознале во текот на работата на „Хамлет“, а професионалната соработка прераснала во љубовна врска. Фајнс поради неа го напуштил бракот, а нивната врска траела речиси една деценија.
Љубов која ја крена прашината
Одлуката да го напушти бракот и да започне врска со жена значително постара од него во тоа време била предмет на голем медиумски интерес. Особено затоа што Фајнс тогаш бил во период на забрзан професионален подем.
Подоцна во медиумите се појавувале тврдења дека во Анис гледал нешто како мајчинска фигура, но самиот однос меѓу нив траел со години и очигледно не бил само краткотрајна романса.
Девет години заедно се доволно долг период за една врска да стане сериозен дел од животот. Но, ниту оваа љубовна приказна немала среќен крај.
Во 2006 година двајцата се разделиле. А причината повторно била – афера.
Потоа се појавила друга жена
Поврзани објави
Додека Фајнс бил во врска со Анис, во медиумите се појавиле тврдења дека актерот имал паралелна врска со романската пејачка Корнелија Кришан.
Кришан подоцна јавно потврдила дека била во врска со актерот. Случајот предизвикал нов бран интерес кај јавноста, а не долго потоа Фајнс и Анис ја завршиле својата деветгодишна врска. Така, приказната што започнала како љубов поради која актерот го напуштил бракот, години подоцна завршила под сенката на нови тврдења за неверство.
Но, тука не завршиле контроверзиите околу неговиот приватен живот.
Скандалот во авион кој ја шокираше јавноста
Неколку години подоцна, Фајнс повторно се најде во центарот на внимание поради наводен интимен инцидент за време на лет од Сиднеј до Мумбај. Според тогашните медиумски извештаи, актерот наводно имал сексуален однос со стјуардеса во тоалетот на авионот. Случајот добил дополнителна тежина бидејќи стјуардесата, според извештаите, била суспендирана, а потоа ја загубила и работата.
Фајнс неколку пати се најде во ситуации во кои неговиот приватен живот стануваше тема за светските медиуми, но самиот актер вообичаено не ја изложува својата интимност во јавноста.
Од скандалите до една од најголемите актерски кариери
И додека јавноста го следела неговиот љубовен живот, професионално Фајнс градел кариера каква што ретко кој актер може да се пофали. Светската публика сериозно го забележала во „Шиндлеровата листа“ од 1993 година, каде што го одиграл бруталниот нацистички офицер Амoн Гет. Улогата му донела номинација за „Оскар“ и награда БАФТА, а неколку години подоцна повторно бил номиниран за најпрестижната филмска награда за улогата во „Англискиот пациент“.
За помладите генерации, сепак, неговото име засекогаш ќе остане поврзано со Лорд Волдемор од филмовите за Хари Потер.
Покрај актерството, Фајнс се испробал и како режисер, потврдувајќи дека неговата амбиција одамна ги надминува границите на актерската професија.
А денес?
За разлика од периодот кога неговите љубовни приказни редовно ги полнеле страниците на таблоидите, во последните години Фајнс многу повнимателно ја чува својата приватност. Неговите јавни настапи најчесто се поврзани со филмските проекти, режисерската работа и актерската кариера, додека за неговиот емотивен статус во јавноста нема премногу информации. И токму затоа неговата љубовна историја и денес предизвикува љубопитност.
Од бракот кој завршил поради љубов со 18 години постара актерка, преку деветгодишната врска која била следена од нови тврдења за неверство, па сè до авионскиот скандал – приватниот живот на Ралф Фајнс бил речиси исто толку драматичен како и некои од ликовите што ги одиграл на големото платно.
А можеби најголемиот парадокс е токму тоа што човекот кој толку маестрално ги толкува најмрачните карактери во филмот, во реалниот живот со децении успева да остане прилично мистериозен кога станува збор за најинтимниот дел од неговата приказна.
Фото: Facebook
