Украинскиот претседател Володимир Зеленски предупреди дека Москва би можела да започне нова голема мобилизација по парламентарните избори, со план во текот на 2026 година да обезбеди дополнителни 300.000 војници.
Зеленски изјавата ја даде во Киев, посочувајќи дека регрутацијата најверојатно ќе биде насочена кон руските региони, а помалку кон големите градови.
„Убедени сме дека по изборите Русија ќе продолжи со мобилизацијата“, изјавил украинскиот претседател пред новинарите.
Според неговите тврдења, Москва размислува за таканаречена „периферна мобилизација“, со која би се обезбедиле нови војници без масовна мобилизациска кампања во најголемите руски урбани центри.
Зеленски смета дека значителен дел од новорегрутираните сили би можел да биде насочен кон источниот фронт. Како можни подрачја ги посочи Костјантинивка, Славјанск и Краматорск, каде што руските сили продолжуваат со воените операции.
Тој не ја исклучи ниту можноста дел од единиците да бидат префрлени кон Суми и Харков, како и кон северните делови на Украина.
Украинскиот лидер тврди дека Русија првично планирала да регрутира околу 500.000 војници, но подоцна целта била намалена на 300.000 за 2026 година. Според него, дополнително регрутирање би можело да продолжи и во 2027 година.
Зеленски истовремено изјави дека Русија од почетокот на годинава изгубила околу 267.000 војници, од кои, според неговите тврдења, околу 155.000 загинале.
Овие бројки, сепак, не можат независно да се потврдат. И двете страни во конфликтот редовно објавуваат податоци за загубите на противникот, а нивната точност е тешко да се утврди.
Доколку најавите за ново зголемување на руските сили се остварат, тоа би можело дополнително да го зголеми притисокот врз украинскиот фронт и да влијае врз текот на борбите во наредниот период.
