Американскиот претседател Доналд Трамп соопшти дека САД привремено го одложиле планираниот воен напад врз Иран, кој бил закажан за вторник, по директни апели од неколку клучни лидери од Блискиот Исток.
Според неговата изјава, емирот на Катар, како и лидерите на Саудиска Арабија и Обединетите Арапски Емирати, упатиле итни барања до Вашингтон да се одложи операцијата, со цел да се остави простор за дипломатско решение и деескалација на тензиите во регионот.
Трамп нагласи дека, од почит кон овие барања и регионалните партнери, им наложил на Пентагон и на врвните воени структури да ја стават операцијата во мирување, но не и целосно да ја откажат.
Истовремено, тој порача дека американските вооружени сили остануваат во целосна готовност и дека планот може повторно да се активира во секој момент доколку не се постигне прифатлив меѓународен договор со Иран.
Оваа изјава доаѓа во период на зголемени тензии на Блискиот Исток, каде дипломатските напори се во тек, но неизвесноста околу можната ескалација сè уште е висока.
