Администрацијата на американскиот претседател, Доналд Трамп, одлучи да не го продолжи контроверзното ослободување од санкциите наменети за руската нафта која се транспортира по морски пат. Ова привремено им овозможи на земји како Индија да продолжат со купување руска сурова нафта, и покрај напорите на Западот за намалување на приходите на Москва во услови на конфликт, објави денес Радио Слободна Европа.
Овој чекор, кој стапи на сила од вчера откако Министерството за финансии не ја обнови Општата лиценца 134Б, ја нагласува сè покомплицираната улога на Вашингтон во наоѓање рамнотежа помеѓу зголемениот притисок врз Кремљ и спречувањето на дополнителни нарушувања на светските енергетски пазари. Овие нарушувања се предизвикани од конфликтот во Иран и тензиите во близина на Ормушката Теснина.
Првично воведено во март, а потоа продолжено во април, ова ослободување дозволуваше трансакции за одредени испораки на руска нафта кои биле натоварени на танкери пред стапувањето на сила на рестриктивните мерки.
Претставници на американската администрација ја оправдаа оваа одлука како привремена мерка за спречување на посериозен глобален енергетски шок, имајќи предвид дека судирите на Блискиот Исток веќе доведоа до пораст на цените на нафтата и ги загрозија клучните транспортни коридори.
Сепак, критичари во Вашингтон и Киев сметаат дека оваа политика ефективно обезбедила финансиска поддршка за Москва, во време кога САД и нивните европски сојузници настојуваат да го заострат економскиот притисок врз Русија поради воениот ангажман во Украина.
Извор: МИА
