Според извештајот објавен денес од Кинескиот центар за информативни мрежи (ЦННИЦ), кинеската индустрија за вештачка интелигенција (ВИ) забележа импресивен раст во изминатата година, достигнувајќи вредност од 700 милијарди јуани (приближно 97,5 милијарди американски долари). Ова претставува континуиран годишен пораст од 20 отсто.
Кинеската ВИ алатка „Дип сик“ брзо привлече огромно внимание, собирајќи повеќе од 30 милиони активни дневни корисници само 20 дена по нејзиното лансирање. Како што пренесува „Глобал Тајмс“, таа се искачи на првото место на листите на најпреземани апликации во 140 земји.
Извештајот исто така нагласува дека Кина е сведок на зголемена експанзија на технологијата за вештачка интелигенција, како во индустриските сектори, така и во широката јавност.
Во рамките на индустријата, кинеските компании кои се занимаваат со развој на вештачка интелигенција постигнаа значителен прогрес во создавањето на модели со стотици милијарди параметри и мултимодални способности. Овие модели сѐ повеќе се користат во области како образованието, дизајнот, канцелариската автоматизација и создавањето на разни видови содржини.
До јуни 2025 година, бројот на интернет корисници во Кина достигна 1,123 милијарди, додека бројот на корисници во руралните средини се зголеми на 322 милиони, се наведува на веб-страницата на кинескиот портал.
