Тринеделната коалициска влада на романскиот премиер Илија Боложан синоќа успешно го помина гласањето за доверба, овозможувајќи ѝ да ги придвижи непопуларните зголемувања на даноците, потребни за намалување на најголемиот буџетски дефицит во Европската Унија.
Владата експресно, преку парламентот, ги усвои зголемувањата на ДДВ, акцизите и другите давачки од август, со цел да се избегне намалување на кредитниот рејтинг под инвестициското ниво и да се овозможи пристап до фондовите на ЕУ.
Широката владина коалиција од четири проевропски партии ја презеде власта кон крајот на јуни, окончавајќи го повеќемесечниот политички ќор-сокак, откако претседателските избори беа одложени во декември и повторени во мај.
Партиите изразија резерви за зголемувањата, кои беа критикувани од работодавачите и синдикатите, додека илјадници работници во јавниот сектор организираа протести.
Крајнодесничарската опозиција во понеделникот поднесе предлог за гласање недоверба и најави дека ќе поднесе уште предлози.
“Разбирам дека опозицијата не се согласува со мерките предложени од владата”, им рече Боложан на пратениците. “Но, тогаш кои се решенијата? Од една страна, ни беше кажано дека проблемите во економијата се сериозни, од друга страна, дека не треба да ги преземаме овие мерки. Не можеме да ги правиме и двете.”
Иако сите четири партии во владата ги одобрија зголемувањата, социјалдемократите, најголемата партија во коалицијата без која владејачкото мнозинство не може да опстане, денес ги критикуваа.
“За солидна, континуирана политичка поддршка, мора брзо да ги исправиме некои од апсурдните работи од овој прв пакет мерки”, изјави лидерот на социјалдемократите, Сорин Гриндеану.
Боложан претходно овој месец изјави дека коалициската влада ќе стори сé што е можно до крајот на годината да го намали дефицитот на околу осум проценти од БДП, од минатогодишните 9,3 проценти.
Тоа е повеќе од почетната цел од седум проценти оваа година, а владата ќе се обиде да го доведе буџетскиот дефицит блиску до шест проценти во 2026 година, се додава.
Според романскиот закон, даночните мерки би можеле да бидат оспорени пред Уставниот суд, а опозицијата минатата недела најави дека ќе се обиде да го стори тоа.
