Европската Унија интензивно бара нови начини за финансирање со цел да го надополни очекуваниот буџетски дефицит на Украина од 19 милијарди долари за идната година, објави Фајненшл Тајмс (ФТ), повикувајќи се на извори во Европската комисија.
Во рамките на Европската унија се анализираат разновидни идеи за тоа како да се оствари оваа цел. Разгледувана е опцијата за директна воена асистенција преку вонбуџетски донации, претходно одобрување на кредити во рамките на веќе постоечката програма на Г7 од 50 милијарди долари и поинтензивна употреба на замрзнатите руски државни средства.
Украина веќе има примено обемни пакети за поддршка, но континуираноста на војната и несигурните економски изгледи креираа нова финансиска празнина која, засега, не е покриена дури ни со странска помош.
Меѓународниот монетарен фонд (ММФ) во своите проекции наведува дека Украина ќе успее да обезбеди доволни средства следната година, но овие прогнози се темелат на претпоставката дека војната ќе заврши до крајот на 2025 година или средината на 2026 година – што Брисел и Киев го сметаат за сè помалку веројатно.
“Постои растечка загриженост за следната година и многу засегнати страни кои сметаа на договор за прекин на огнот оваа година мора повторно да ги пресметаат своите трошоци и да сфатат дека постои финансиски дефицит”, изјави висок функционер на Европската Унија вклучен во разговорите со Киев, зборувајќи под услов да остане анонимен.
Самит посветен на помошта за Украина ќе се одржи подоцна оваа недела во Рим, на кој ќе учествува претседателката на Европската комисија, Урсула фон дер Лајен. На состанокот би можеле да се донесат конкретни одлуки за понатамошно финансирање на земјата зафатена од војна. сд/фото:МИА архива .
Извор: МИА
