Владата на американскиот претседател Доналд Трамп е во процес на укинување на повеќе од 500 позиции во медиумската организација надлежна за Гласот на Америка (ВОА) и другите странски медиуми финансирани од државата, објави портпаролот на владата за медиуми, Кари Лејк.
Оваа одлука на Лејк доаѓа еден ден откако федерален судија ја спречи нејзината одлука за отпуштање на Мајкл Абрамовиц од позицијата директор на ВОА, пренесоа американските медиуми.
Окружниот судија, Ројс Ламберт, во посебна одлука, констатираше дека администрацијата не ја исполнила неговата наредба за враќање на Абрамовиц на функцијата во ВОА. Ламберт претходно пресуди дека Абрамовиц не може да биде сменет од функцијата без одобрение од мнозинството членови на Меѓународниот советодавен одбор за јавни радиодифузери.
“Разрешувањето на Абрамовиц би било едноставно спротивно на законот,” заклучи Ламберт, кој беше назначен за судија од страна на поранешниот претседател Роналд Реган.
Лејк објави соопштение на социјалните мрежи во кое истакна дека нејзината агенција започнала процес на намалување на бројот на вработени, што ќе доведе до укинување на 532 работни места. Таа додаде дека овие чекори ќе придонесат за поефикасно функционирање на медиумската агенција, со цел “Гласот на Америка повторно да биде слушнат во странство и таму каде што е најважен.”
Група вработени во агенцијата, кои поднесоа тужба за да го спречат прекинот на емитувањето на ВОА, изјавија дека овој потег ќе им даде на нивните колеги 30 дена додека не престанат да добиваат плати и бенефиции.
Во јуни, известувања за прекин на работниот однос беа испратени до група од над 600 вработени во медиумската агенција, а Абрамовиц беше испратен на платено отсуство, како и речиси сите вработени во ВОА.
Американската агенција за глобални медиуми е исто така надлежна за Радио Слободна Европа и Азија, како и за Радио Марти, кое емитува вести на шпански јазик за Куба, потсетуваат американските медиуми.
сд/фото:МИА архива .
