Супертајфунот Рагаса, најмоќниот тропски циклон во светот за тековната година, денес го зафати Хонг Конг со ветрови од ураганска јачина и изненадни надоаѓања на вода, додека неговите поројни врнежи во Тајван однесоа најмалку 14 животи.
Во Хонг Конг, улиците се напуштени, поради тоа што официјалните лица ги советуваа граѓаните да останат во нивните живеалишта. Делови од источниот и јужниот брег на азискиот финансиски центар се под вода.
Прогнозите се дека супертајфунот ќе го сочува својот степен на јачина движејќи се кон брегот на кинеската провинција Гуангдонг, каде што престојуваат повеќе од 125 милиони луѓе.
Владите во Гуангдонг извршија евакуација на повеќе од 770.000 лица, беше објавено од страна на државниот радиодифузер CCTV. Рагаса ја опустоши северната област на Филипините пред два дена, а Тајван вчера.
Во областа Хуланиен, на источната страна на островот, вчера трагично загинаа 14 лица, а повеќе од 100 се водат како исчезнати, откако таму се излеа брана, информираше противпожарната служба.
Официјалните претставници предупредија на пораст на морското ниво, споредливо со тајфунот Хато во 2017 година и тајфунот Мангхут во 2018 година. И двата тајфуни предизвикаа штета проценета на милијарди долари.
