Како што стареат вашите миленици, нивните потреби и способности може да се променат. Сепак можете да уживате во поминувањето време со нив додека им помагате да стареат достоинствено.
ПОЧЕСТО НОСЕТЕ ГО НА ВЕТЕРИНАР
Кучето од седум години и повеќе или мачката од единаесет години нагоре треба да ги носите на ветеринар во просек двапати годишно за да ја следите нивната подвижност и сите постоечки болести. Се препорачува редовно да водите евиденција за способностите и однесувањето на вашето домашно милениче за да можете да забележите промени во состојбата од една до друга посета на ветеринар.
Сите знаци на промени во однесувањето треба да бидат придружени со детален ветеринарен преглед – крв, урина, физиолошки промени. За време на прегледот, ветеринарот треба да ја разгледа состојбата на целото тело, да регистрира како се движи животното и да ја тестира подвижноста на неговите зглобови.
ПРИСПОСОБУВАЈТЕ ЈА ОКОЛИНАТА НА ВАШИОТ МИЛЕНИК
Вашиот некогаш спортски пријател може да има проблеми со трчањето по скали, скокањето, виткањето или одењето по плочки или подови поради лизгање. Размислете да направите некои промени во куќата кои би им одговарале на неговите потреби – ставете дополнителни теписи во ходниците, преместете го креветот на поповолно место… Достапноста на храна е исто така важна.
Сите овие мали измени можат да го подобрат квалитетот на животот на вашето домашно милениче. Можете исто така да направите поудобно место за спиење на мачките затоа што тие ја губат телесната топлина побрзо додека ја губат мускулната маса, па додавањето волнена подлога во нивниот кревет во која ќе можат да ползат ќе направи разлика.
НЕКА БИДАТ МЕНТАЛНО АНГАЖИРАНИ
Поврзани објави
Слично како што луѓето можат да доживеат дезориентација или когнитивно опаѓање како што стареат, постарите миленичиња може да страдаат од синдром на когнитивна дисфункција. Најдобар начин да го забавите тој пад е да го задржите вашето домашно милениче ментално ангажирано. Сложувалките, кои го поттикнуваат вашето куче или мачка да го „решат проблемот“ за да го „отклучат задоволството“, се одлични за тренирање на умот.
Ако се физички способни, кучињата можат да најдат стимулација и на „часови“ за умешност или обука за душкање, додека мачките имаат корист од игрите што вклучуваат активирање на нивните ловечки инстинкти. На пример, обидете се да ставите храна за вашата мачка на неколку скриени места низ куќата за време на оброците, за да може да „лови“ и да ја најде.
ОЧЕКУВАЈТЕ ПРОМЕНИ ВО ОДНЕСУВАЊЕТО
Како што старее вашето домашно милениче, може да развие одредени однесувања што ги немало порано. Новите знаци на агресија или анксиозност често се поврзуваат со физичките промени што ги доживува. Ако кучето повеќе не гледа добро, може да се плаши да се спушти по скалите. Ако мачката не слуша, може да биде нервозна затоа што некој ѝ приоѓа одзади и да има необични реакции. Од друга страна, ако вашето домашно милениче покажува збунетост или асоцијално однесување – спие на чудни места, ноќе шета, се крие – ова може да биде знак за когнитивни проблеми.
РАЗМИСЛЕТЕ ЗА АЛТЕРНАТИВНИ ТЕРАПИИ
За домашните миленици со болки во зглобовите или артритис, смирувањето на болката е клучно. Сега постојат центри за физикална терапија за домашни миленици кои нудат сè, од аква-терапија и масажа до акупунктура. Акупунктурата е одлична за ублажување на болката, подобрување на протокот на крв и за релаксација. Исто така, се препорачува да разговарате со вашиот ветеринар за додатоци како рибино масло, кое може да помогне да се намали воспалението.
Текст: Лидија Ќулибрк
Фото: Alexandru Rotariu by Pexels
