Досадните кафени дамки на исечената банана наскоро би можеле да станат минато. Новата сорта, развиена со технологија за уредување на гените, ја задржува свежата боја подолго време, без промена на вкусот и текстурата.
Британската биотехнолошка компанија „Тропик Биосајенсис“ развила банана што значително побавно потемнува по лупењето и сечењето. Иновацијата веќе добила првично одобрение од британската влада, а во иднина би можела да се најде и во британските супермаркети.
Како функционираат бананите што не потемнуваат?
Кога бананата ќе се излупи или исече, нејзиното месо доаѓа во контакт со воздухот. Тогаш се активира ензимот полифенол оксидаза, кој предизвикува појава на кафени дамки.
Научниците го искористиле системот за уредување на гени CRISPR-Cas9 за да изменат три копии од генот одговорен за создавање на овој ензим. Така ја намалиле неговата активност и го забавиле процесот на потемнување, без да влијаат врз вкусот и текстурата на овошјето.
Според компанијата, бананите може да ја задржат свежата боја уште еден или два дена по лупењето, а резултатите се уште подобри ако се чуваат во фрижидер.
Поврзани објави
Може ли новата сорта да го намали фрлањето храна?
Освен што ќе ја олесни подготовката на овошни салати, смути и готови оброци, оваа технологија може да помогне и во намалувањето на отпадот од храна.
Според претходно британско владино истражување, во Велика Британија секој ден се фрлаат околу 1,4 милиони јадливи банани. Дополнително, околу 30 отсто од потрошувачите признале дека фрлаат банана само поради помали модринки или темни дамки.
Компанијата проценува дека новата сорта би можела да придонесе за намалување на отпадот од банани и поврзаните емисии на стакленички гасови во синџирот на снабдување за повеќе од 25 отсто. Се проценува и дека технологијата би можела да помогне во намалување на годишните емисии на јаглерод поврзани со глобалниот извоз на банани за повеќе од девет милиони тони.
Иако промената на бојата не значи дека бананата е расипана, подолгото задржување на свежиот изглед може да ја направи попривлечна за потрошувачите и да го намали непотребното фрлање храна.
Фото: pexels
