Магазинот „Убавина и здравје“ ги прослави хуманоста и иновациите – Убавина и здравје

„Убавина и здравје“ ја сочуваа традицијата на доделување У&З награди за добри дела, преку кои им оддаваат почит и внимание на хуманите луѓе и општествено одговорните компании, кои преку својот пример поттикнуваат позитивни промени. Покрај тоа, на влезот беше поставена кутија за донации за настраданите во трагедијата во Кочани, со цел заеднички да се даде скромен придонес за луѓето со чија тага сочувствува целото општество.

Еве кои хуманитарци и компании добија признанија за својата хуманост и општествена одговорност:

Награда за хуманост за основачите и волонтерите на иницијативата Support Kocani, организирана по повод трагедијата во дискотеката „Пулс“.

Почесно признание за хуманост за Иле Гоцевски – возачот на Брза помош, херојот кој го даде животот за да помогне. Неговото срце, кое е синоним за човековата добрина и големина, не го издржа поривот да им помогне на што е можно повеќе сограѓани. Признанието го подигна сопругата на Иле, Анета Гоцевска, која им се обрати на присутните со трогателен говор.

Награда за општествена одговорност за Марија Кукуноска, генерална менаџерка на Premium Safety Solution, жената која прва во списанието „Убавина и здравје“ отвори разговор за безбедноста, пожарите, здравјето на работа – не како обврска, туку како култура на живеење.

Награда за хуманост за Огнен Стаматоски, човек кој во континуитет го подигнува стандардот на лицата со попречености и најревносно води кампањи за подигнување на јавната свест. Тој во 2001 година ја формираше Special Olympics Macedonia, а наградата му беше доделена за најновиот проект Soul & Art Inclusion, преку кој лицата со пречки во развојот имаат можност да ги покажат своите музички таленти, да учат, да музицираат, да уживаат во музиката и да не се чувствуваат отфрлени од општеството. На сцената, на Огнен му се придружија и Ена и Коста – едни од неговите најпосветени ученици.

Награда за општествена одговорност за dm дрогерие маркт за кампањата „Никогаш повеќе сама“, со која го збогатија знаењето и ја зајакнаа свеста за менструалното здравје во Македонија. Признанието го подигна Сандра Атанасковиќ, дел од маркетинг-тимот на dm Македонија.

Единствени во Светска туристичка организација – Универзитетот Скопје е еден од 100-те најдобри според критериумите на Обединетите Нации. Признанието го прими деканот на Факултетот за туризам на Универзитет Скопје, проф. д-р Сашко Граматниковски, а на сцената му се придружи и преостанатиот дел од тимот.

Награда за хуманост за Василка Рудовска за нејзината мисија да ја поткрева свеста за неодговорното сопствеништво на миленици, за свирепоста на луѓето кон животните, како и да открива, чува, спасува и безбедно да вдомува огромен број бездомни животни. Повеќе за нејзината иницијатива можете да дознаете на нејзиниот инстаграм-профил @vasilkarescues.

Награда за општествена одговорност за А1 Македонија за платформата „Подобар онлајн свет“, со што ја презема улогата не само како технолошки лидер, туку и како партнер на заедницата, градител на дигиталната култура и чувар на вредностите кои го прават Интернетот место за личен раст, едукација и поврзување.

Награда за хуманост за  отец Оливер Петровски, кој раководи со хуманитарната организација „Свети Спас“, за неговата посветеност на хуманитарните акции и активности во изминатите 10 години.

Награда за општествена одговорност за Шпаркасе Банка АД Скопје за платформата Sparkasse Life, која има трајно влијание врз сите сегменти на живеењето: спортот, културата, едукацијата, животната средина и економијата.

По наградите, Ирис повторно се обрати и го најави доделувањето на подароците за присутните. Имено, гостите извлекуваа инспиративни пораки на влезот, од кои една порака беше добитна. Сите оние кои ја извлекоа добитната порака, која симболично гласеше „Одмори го телефонот, активирај го умот“, добија вредни подароци: 20 ваучери од „Силуете“ за персонализирани третмани за лице и тело, два парфема од „Мартимекс“, Eli Saab и Monotheme, и два авионски билети за Бодрум од Kartaca Turizm. Покрај тоа, беа доделени 100 ваучери во вредност од 1000 денари од Avant2Go, како и многу фантастични подароци од генералните покровители essence и Catrice.