Владиката Петар се прв пут обрати во јавноста повод отварањето на неговата регионална телевизија, но не откри детали. Тој за Канал 5 објасни дека прво ќе се отвори телевизијата, а потоа ќе излезе со информации за тоа каква програма ќе емитира. “Додека не ја отвориме, нема потреба да даваме информации. Штом ја отвориме, тогаш ќе ја знаеме точната програма”, изјави владиката Петар.
Директорот на Комисијата за односи со верски заедници и религиозни групи, Даријан Сотировски, не коментираше влезот на владиката Петар во медиумскиот бизнис, но го повика да ја запознае јавноста со својата програма. “Доколку користи своето право за емитување на програма според законската рамка, тоа е поздравено. Но потребно е да видиме детали. Субјектот ќе мора да се обрати јавноста и да емитира програма за јавноста”, изјави Сотировски.
На почетокот на овој месец, Агенцијата за аудио и аудиовизуелни медиумски услуги го одобри отварањето на телевизијата на компанијата “Преобразба”, чии основач е владиката Петар. Компанијата има седиште во Скопје и произведува филмови, видеофилмови и телевизиска програма. Телевизијата ќе емитира на регионално ниво, во општините Скопје, Чучер Сандево, Арачиново, Илинден, Петровец, Зелениково, Студеничани и Сопиште. Ако до 1-мај телевизијата не започне со емитување, Агенцијата ќе го исклучи Медиумот од регистарот на радиодифузери и ќе му го одземе дозволата.
