Според извештајот на Федералниот завод за статистика во Визбаден, бројот на лица без државјанство кои престојуваат во Германија се зголеми двојно по бегалскиот бран во 2015 година.
„На крајот на 2022 година, во централниот регистар на странци беа евидентирани 29.455 лица без државјанство, што е двојно повеќе од бројот на мигранти пред бранот во 2015 и 2016 година“, вели соопштението на Заводот за статистика.
Повеќе од половина од овие лица потекнуваат од Сирија, а причината за тоа е немањето на лични документи кои да го потврдат нивното државјанство. Исто така, сириските граѓани едвај можат да ги добијат овие документи поради несоработката на властите во Сирија.
Според Обединетите нации, недостигот на државјанство може да има врска и со родова дискриминација. Во некои земји, жените не можат да го пренесат своето државјанство на своите деца.
Децата родени во Германија не добиваат автоматски германско државјанство, освен доколку еден од родителите престојувал во Германија најмалку осум години и не поседува неограничена дозвола за престој. Странците можат да аплицираат за германско државјанство по осум години легален престој, а освен неограничена дозвола за престој, потребен е и доказ за доволен приход за нив и нивното семејство и потврда за неказнивост.
Германија, исклучувајќи граѓаните на земјите-членки на ЕУ, не дозволува двојно државјанство.
Бегалците од Сирија имаат право на заштита во Германија, а можат да аплицираат за државјанство по осум години, доколку исполнуваат услови.
Барателите на азил уништуваат своите документи со цел да дадат лажни информации за своето потекло и зголемат шансите за политички азил.
