Едноставен рецепт за колач што секогаш успева – Убавина и здравје

Се подготвува без многу труд, а со нежниот вкус на ванила и меката текстура е одличен избор за попладневно кафе или дружење со најблиските.

Куглофот со ванила е класичен домашен колач кој освојува со едноставноста, пријатниот мирис и меката, воздушеста структура. Не бара комплицирани техники ниту многу време за подготовка, па затоа е одличен избор и за оние што не поминуваат често време во кујната.

Неговиот нежен вкус на ванила одлично се надополнува со шолја кафе или чај, а за дополнителна свежина во смесата може да се додаде и малку рендана кора од лимон. По печењето, доволно е да се нароси со шеќер во прав и подготвен е за послужување.

Потребни состојки:

• 200 грама шеќер

• 1 кесичка ванилин шеќер

• 1 лажичка екстракт од ванила

• 200 милилитри млеко

• 150 милилитри сончогледово масло

• 300 грама бело брашно

• 1 кесичка прашок за печиво

• 1 прстофат сол

• рендана кора од 1 непрскан лимон

За премачкување на калапот ќе ви треба малку путер, а за посипување две лажици брашно. На крај, подгответе и шеќер во прав.

Подготовка:

Најпрво загрејте ја рерната на 180 степени. Калапот за куглоф премачкајте го добро со путер, вклучувајќи ги и сите вдлабнатини, а потоа посипете го со брашно. Протресете го за брашното рамномерно да се распореди и отстранете го вишокот.

Во поголем сад изматете ги јајцата, шеќерот и ванилиниот шеќер околу четири до пет минути, додека не добиете светла, пенеста и воздушеста смеса. Додајте го екстрактот од ванила и, доколку сакате, ренданата кора од лимон, па кратко промешајте.

Потоа постепено додавајте ги млекото и маслото, матејќи со најмала брзина. Во посебен сад измешајте ги брашното, прашокот за печиво и солта. Просејте ги во течната смеса и внимателно соединете ги со маталка или шпатула. Важно е да не мешате предолго, бидејќи така колачот може да ја изгуби воздушестата текстура.

Готовата смеса рамномерно истурете ја во подготвениот калап. Лесно протресете го или неколкупати нежно потчукнете го на работната површина за да се отстранат поголемите воздушни меурчиња.

Печете 40 до 50 минути на 180 степени. По 40 минути проверете дали куглофот е готов така што ќе боцнете дрвено стапче во најдебелиот дел. Ако излезе суво, без траги од сурово тесто, колачот е испечен.

Извадете го од рерната и оставете го во калапот 10 до 15 минути. Потоа внимателно превртете го врз решетка или чинија и оставете целосно да се излади. Пред послужување наросете го со шеќер во прав и исечете го на парчиња.

Мал совет за уште помек куглоф: Јајцата и млекото извадете ги од фрижидер навреме за да достигнат собна температура. Откако ќе го додадете брашното, избегнувајте долго матење – токму тоа е еден од триковите за колачот да остане лесен и воздушест.

Фото: pexels