Агенцијата за иновации, научно-технолошки развој и претприемништво – ИНОВА, денеска потпиша договор со реномираната компанија European Innovation Solutions S.A. за изработка на физибилити студија, подготовка и дизајнирање на оперативна рамка и бизнис-план за основање на Научно-технолошки парк (НТП).
Ова е конкретен чекор во реализацијата на една од стратешките иницијативи на Владата, која Министерството за образование и наука и ИНОВА заеднички ја спроведуваат, со цел создавање современа инфраструктура за научноистражувачка дејност, технолошки развој, претприемништво и посилно поврзување на академската заедница со реалниот сектор.
Со потпишувањето на договорот започнува процесот на подготовка на сеопфатна физибилити студија, која ќе ја утврди изводливоста и потенцијалите за воспоставување на Научно-технолошки парк, вклучително и детална анализа на можностите за воспоставување модел на јавно-приватно партнерство. Паралелно, ќе се изработи бизнис-план заснован на интегриран аналитички пристап, со прецизно дефинирани активности, организација на работата и временска рамка.
Крајниот резултат ќе опфати интегриран концепт и мастер-план, техничка рамка, институционален и управувачки модел, деловен, оперативен и финансиски модел, како и јасен патоказ за имплементација, со задолжително разработен модел за воспоставување јавно-приватно партнерство.
Од страна на European Innovation Solutions S.A., на средбата присуствуваа д-р Парис Кокоротсикос (Phd. Paris Kokorotsikos), тим-лидер и експерт за воспоставување научно-технолошки паркови, и Никос Џанулидис (Nikos Giannoulidis), експерт за иновациски екосистеми, деловни операции и бизнис-планирање.
Паркот е замислен како централно национално јадро за развој и примена на приоритетните домени на паметната специјализација, преку поврзување на истражувањето, применетата наука, технологијата и иновациите. Неговата улога ќе биде да создаде функционален мост меѓу научноистражувачките капацитети и потребите на реалниот сектор, овозможувајќи резултатите од истражувањата да прераснат во конкретни иновативни производи, услуги и бизнис-решенија.
Преку понуда на лабораториски услуги, програми за инкубација и акцелерација, трансфер на знаење и технологии, како и друга специјализирана поддршка за развој и комерцијализација на иновациите, Научно-технолошкиот парк ќе создаде услови за раст и развој на технолошки стартапи, микро, мали и средни претпријатија, истражувачки единици и спин-оф компании.
Истовремено, ќе претставува национална платформа за поврзување со европската иновациска инфраструктура и релевантните програми за истражување и иновации, вклучително и Заедничкиот истражувачки центар на Европската Унија (JRC) и Европскиот совет за иновации (EIC).
Иницијативата директно придонесува кон спроведувањето на повеќе национални стратешки документи, меѓу кои Националната развојна стратегија 2024–2044, Националната стратегија за образование 2026–2032, Стратегијата за паметна специјализација (S3-МК) 2024–2027, Стратегијата за МСП 2025–2030, Стратегијата за развој на ИКТ – SMART/MK 2030, како и Четиригодишната програма на Владата за унапредување на иновациите, науката, технолошкиот развој и претприемништвото.
Во рамки на својата надлежност и мисија, ИНОВА работи на зајакнување на националниот иновациски екосистем, поттикнување на применетите истражувања и унапредување на соработката меѓу академската заедница и индустријата. Оваа иницијатива се надоврзува на повеќегодишните напори за развој на националните капацитети за истражување, иновации и трансфер на технологии, како и за надминување на јазот меѓу научноистражувачкиот сектор и бизнис-заедницата.
Со својата идна функција, Научно-технолошкиот парк треба да стане водечка инфраструктура за истражувачка извонредност, трансфер на технологии, претприемништво и економски раст базиран на иновации. Поврзувајќи ги универзитетите, истражувачките центри, стартапите и компаниите, ќе отвори простор за создавање работни места со висока додадена вредност, развој на нови технологии и зајакнување на регионалната конкурентност на домашната економија.
ИНОВА, врз основа на успешно спроведена постапка за јавна набавка, го додели договорот на European Innovation Solutions S.A., кој денеска беше потпишан од двете договорни страни.
Преку оваа иницијатива, ИНОВА прави важен чекор кон создавање предуслови за современа научно-технолошка инфраструктура, која ќе овозможи знаењето да се претвора во иновации, иновациите во успешни бизниси, а истражувањето во конкретна економска вредност.
