Не се виновни само милениците – текстилот, креветчињата, теписите и омилените места каде што спијат можат да ги задржат непријатните мириси со денови
Животот со куче или мачка носи многу радост, но и неколку предизвици кога станува збор за одржувањето на домот. Еден од најчестите се непријатните мириси кои со текот на времето можат да се задржат во просториите, дури и кога редовно се чисти. Една од главните причини се ткаенините со кои милениците секојдневно доаѓаат во контакт – креветчиња, прекривки, перници, теписи, гарнитури и други текстилни површини.
Најмногу внимание треба да им посветите на местата каде што вашето куче или мачка поминува најмногу време. На нив може да се насоберат влакна, маснотии од кожата, плунка и други нечистотии кои постепено создаваат непријатен мирис. Затоа редовно перете ги прекривките и навлаките, а доколку купувате креветче за миленик, практично решение се моделите со навлаки што можат да се извадат и да се перат во машина. Не ги заборавајте ниту теписите и тапацираниот мебел, каде мирисите можат длабоко да навлезат во влакната.
Многумина кога ќе почувствуваат непријатен мирис веднаш посегнуваат по освежувачи за воздух. Но, тие најчесто само го прикриваат мирисот, без да го отстранат неговиот извор. Многу подобар пристап е прво да откриете од каде доаѓа мирисот, а потоа темелно да ја исчистите површината. Доколку користите средства за чистење или неутрализирање мириси, проверете дали се безбедни за домашни миленици и секогаш следете ги упатствата за употреба. Особено бидете внимателни со интензивни мириси и етерични масла, бидејќи некои состојки може да им бидат штетни на кучињата и мачките.
Поврзани објави
Важна е и редовната вентилација на домот, како и хигиената на самото животно
Кај мачките редовно чистете ја кутијата со песок и просторот околу неа, додека кај кучињата обрнете внимание на чистењето на шепите по прошетка, редовното четкање и одржувањето на нивната опрема. Не претерувајте со капење, бидејќи премногу честото миење со несоодветни средства може да ја наруши природната заштита на кожата.
И уште нешто важно: ако кучето или мачката одеднаш добијат многу силен или необичен телесен мирис, не го игнорирајте. Понекогаш причината може да биде здравствен проблем, па во таков случај најдобро е да се консултирате со ветеринар. На крајот, целта не е домот постојано да мириса на средства за чистење, туку да се отстрани изворот на непријатниот мирис. Редовното перење на текстилот, чистењето на омилените места на миленикот, проветрувањето и правилната хигиена можат да направат огромна разлика.
pexels
