Се приготвуваат лесно, заситуваат и подобар избор се од печива и брза храна – Убавина и здравје

Добриот ручек за на работа не значи рано станување и часови поминати во кујна.

Ако често ви се случува да излезете од дома без подготвен ручек, а неколку часа подоцна изборот да се сведе на нешто од пекарница, достава или брза храна, добра вест е дека оброкот за на работа не мора да биде комплициран.

Со неколку основни состојки можете да приготвите ручек што лесно се носи, добро заситува и не бара многу време во кујната. Најпрактични се комбинациите што содржат протеини, зеленчук и јаглехидрати, бидејќи така добивате балансиран оброк што подолго ќе ве држи сити.

Пилешко со ориз и зеленчук

Состојки:

• 150 г пилешко филе
• 70 г ориз
• 150 г мешан зеленчук
• 1 лажичка маслиново масло
• сол
• црн пипер
• малку црвен пипер

Приготвување:

1. Сварете го оризот според упатството на пакувањето.
2. Пилешкото филе исечете го на помали парчиња, посолете, побиберете и зачинете со црвен пипер. Испечете го на малку масло додека добие убава боја.
3. Во истото тавче додајте го зеленчукот и кратко продинстајте го.
4. Сè заедно ставете во сад со сварениот ориз.

Овој оброк можете да го приготвите претходната вечер и следниот ден само да го понесете на работа.

Тортиља со пилешко и сос од јогурт

Состојки:

• 1 голема тортиља
• 120 г печено пилешко
• неколку листови зелена салата
• 1 помал домат
• половина краставица
• 2 лажици јогурт
• малку сол
• неколку капки лимонов сок

Приготвување:

1. Пилешкото исечете го на ленти, а доматот и краставицата на помали парчиња.
2. Јогуртот измешајте го со малку сол и лимонов сок.
3. Тортиљата премачкајте ја со сосот, па додајте ги салатата, зеленчукот и пилешкото.
4. Цврсто свиткајте ја.

Ако ја носите на работа, најдобро е да ја завиткате во хартија за печење или во фолија.

Салата со туна и варени јајца

Состојки:

• 1 конзерва туна
• 2 варени јајца
• 1 помала краставица
• 1 домат
• 1 шака зелена салата
• 2 лажици пченка
• неколку маслинки
• 1 лажичка маслиново масло
• малку лимонов сок
• сол

Приготвување:

1. Јајцата сварете ги, изладете ги и исечете ги на четвртини.
2. Зеленчукот измијте го и исечкајте го, па додајте ги исцедената туна, пченката и маслинките.
3. Зачинете со маслиново масло и лимонов сок, посолете по вкус и на крајот додајте ги варените јајца.

Ако ја носите салатата на работа, преливот можете да го ставите во посебен сад и да го додадете непосредно пред јадење.

Омлет со зеленчук и сирење

Состојки:

• 3 јајца
• половина пиперка
• 1 шака спанаќ
• 30 г сирење
• 1 лажичка масло
• сол
• црн пипер

Приготвување:

1. Пиперката исечете ја на ситни коцки и кратко пропржете ја на малку масло.
2. Додајте го спанаќот и почекајте да омекне.
3. Јајцата изматете ги со малку сол и црн пипер, па прелијте ги преку зеленчукот.
4. Кога омлетот ќе почне да се стега, издробете го сирењето одозгора.
5. Печете уште неколку минути, а потоа оставете го да се излади и исечете го на парчиња.

Вака приготвениот омлет можете да го понесете во кутија и да го јадете ладен или подгреан.

Интегрални тестенини со зеленчук и фета

Состојки:

• 80 г интегрални тестенини
• половина тиквичка
• половина пиперка
• неколку чери-домати
• 40 г фета-сирење
• 1 лажичка маслиново масло
• сол
• црн пипер
• малку оригано

Приготвување:

1. Тестенините сварете ги „ал денте“ и исцедете ги.
2. Тиквичката и пиперката исечете ги на помали парчиња и кратко пропржете ги на маслиново масло.
3. Додајте ги преполовените чери-домати, а потоа измешајте ги со сварените тестенини.
4. Зачинете со сол, црн пипер и оригано.
5. Кога малку ќе се изладат, додајте го издробеното фета-сирење.

Може да се јаде и ладно, па затоа е особено практично за носење на работа.

Фото: Drazen ZigicDrazen Zigic Дражен Жигиќ/Freepik