Храбар потег на млад човек денес привлече внимание на плажата во Олимпијада, Грција, откако во силно разбрануваното море семејство од Бугарија се нашло во опасност.
Според сведоштвото објавено на социјалните мрежи од Јасна Николовска, големите бранови го однеле семејството подалеку од брегот, по што жената почнала панично да бара помош.
Во тој момент, меѓу капачите на плажата, реагирал нејзиниот син Михаил. Без да се двоуми, тој влегол во морето и најпрво ја извлекол жената, а потоа им помогнал и на детето и на таткото да стигнат до безбедно.
Неговиот храбар чин бил проследен со аплауз од присутните на плажата. Според објавата, по спасувањето Михаил бил пречекан со благодарност, а луѓето му се придружиле на семејството во моментите на олеснување и радост.
„Од цела плажа, скокна син ми Михаил, ја извлече прво жената, па детето и на крај таткото. Цел народ од плажата му аплаудираше“, напиша неговата мајка.
Но, објавата не е само сведоштво за случката. Николовска ја искористила и можноста да ја сподели гордоста што ја чувствува поради постапката на својот син.
Таа посочува дека е особено среќна што Михаил израснал во човек кој во критичен момент не се свртел настрана, туку решил да помогне.
Во емотивниот дел од објавата, мајката се осврнува и на неговите училишни години, наведувајќи дека, според нејзиното искуство, во ОУ „Кирил и Методиј“ во Битола тој бил потценуван и недоволно поддржуван.
„Ова го пишувам, со плачење, од бескрајна среќа во каков човек израсна Михаил“, напишала таа, додавајќи дека денешниот настан за неа претставува доказ дека човечноста и карактерот се најважни.
Случката во Олимпијада уште еднаш потсетува колку брзо условите во морето можат да се променат и колку е важно капачите да бидат внимателни кога има силни бранови.
За семејството од Бугарија, денешниот ден можел да заврши со трагични последици, но благодарение на брзата реакција на Михаил, сите тројца биле извлечени од морето.
