Американскиот претседател Доналд Трамп повторно упати остри критики кон Канада, продлабочувајќи ги тензиите меѓу двете соседни земји. Тој ја оцени Отава како една од најтешките држави со кои Вашингтон се обидува да постигне договор.
Во интервју за политичкиот коментатор Глен Бек, Трамп ја обвини канадската влада дека со години има нефер трговски однос кон САД и дека применува високи царини за американските производи.
Тој како аргумент го наведе и американскиот трговски дефицит со Канада, кој според него достигнува околу 60 милијарди долари годишно. Трамп порача дека Вашингтон повеќе нема да прифаќа ваков однос и повтори дека САД не се зависни од канадските природни ресурси.
Американскиот претседател истакна дека пред прекинот на последните разговори, Отава добила понуда што тој ја оцени како поволна, но дека договор не бил постигнат.
Изјавите доаѓаат во период на ново заострување на трговскиот спор меѓу САД и Канада. Вашингтон неодамна воведе царини од 50 проценти за дел од канадскиот увоз, додека дополнителни мерки се најавени за автомобилската индустрија и челикот.
Канада возврати со најави за сопствени контрацарини, кои би опфатиле американски производи вредни околу 20 милијарди долари.
Засилената реторика од двете страни отвора нова неизвесност за трговските односи меѓу САД и Канада, кои се меѓу најзначајните економски партнери во Северна Америка.
