Летната туристичка сезона е во полн ек, а тоа повторно се чувствува на граничниот премин Богородица, каде денеска се создаваат поголеми колони и патниците се соочуваат со подолги задржувања.
Според информациите од терен, за преминување на границата кон Грција во моментов се чека околу еден час, поради значително зголемениот број возила и патници.
Најголем дел од возилата се упатуваат кон грчките туристички центри, што дополнително го зголемува притисокот врз граничниот премин. Во периодот на летните одмори, Богородица традиционално е меѓу најоптоварените премини во земјава, особено во деновите кога има масовни заминувања кон грчкото крајбрежје.
Долгите колони може дополнително да се зголемат во текот на денот, особено во попладневните часови, кога кон југ се упатуваат уште поголем број туристи.
На патниците им се препорачува да бидат трпеливи, да имаат доволно вода за патувањето и да ја следат состојбата на граничните премини пред да тргнат. Доколку имаат можност, возачите можат да го изберат периодот на патување во кој очекувано има помала фреквенција.
Со оглед на тоа што летната сезона е во својот најинтензивен период, се очекува засилен сообраќај на Богородица и во наредните денови.
