На граѓанската трибина на СДСМ и Коалицијата во Крушево, кандидатот за градоначалник, Томе Христоски, ги претстави своите планови и остварувања, потенцирајќи дека Крушево претставува обележје на сплотеност, просперитет и визија.
“Вечерва сме собрани сите заедно со една голема причина да ја потврдиме довербата што ја градевме заедно изминативе години. Да покажеме дека Крушево е симбол на заедништво, напредок и визија”, изјави Христоски.
Во текот на своето излагање, тој со гордост истакна: “Јас сум горд што сум вашиот градоначалник, горд што сум вашиот кандидат за нов мандат и горд што зад мене стои тим советници од СДСМ партијата која секогаш знаела да води, да создава и да реализира со дела токму тука во Крушево”.
Христоски ги наведе клучните проекти реализирани во изминатиот период, како што се изградба на резервоари и пумпни станици, реновирање на фекалната и атмосферската канализација во селата, модерен систем за надзор на водоснабдувањето, обезбедување на квалитетна вода, како и рехабилитација на патните правци до познати места како Крушевското Езеро и Мечкин Камен, вклучувајќи ги локалните и регионалните патишта.
Тој подвлече дека овие успешни иницијативи се плод на координирана работа и посветеност, а дека претстојниот период нуди нови, амбициозни цели. “Ова е нашата визија Крушево кое е модерно, европско, напредно, чисто и полно со живот”, истакна Христоски, додавајќи: “Ова не е само програма, ова е животна шанса за секој од нас. Разликата е јасна – каде беше Крушево до 2017 и каде е денес. Денес е модерен град, гордост и симбол на Македонија”.
Во својот апел до граѓаните од сите етнички групи, Христоски ги повика да го дадат својот глас на 19 октомври за да се продолжи со развојот и унапредувањето на Крушево. “Јас не ветувам невозможни работи. Јас ја ветувам истата чесност, иста енергија и иста борбеност како и изминативе осум години. Ветувам дека ќе бидам вашиот глас, вашиот сојузник и вашиот искрен и отворен градоначалник, како и досега”, рече тој.
“Сега е моментот повторно да застанеме заедно. Да го зачуваме она што го изградивме и да продолжиме уште посилно, уште похрабро и уште поодлучно. Најдоброто за Крушево допрва доаѓа”, заклучи Христоски.
бк/фото: СДСМ
Извор: МИА
