Претседателот на Србија, Александар Вучиќ, денес соопшти дека од идната седмица ќе се воведат ограничувања на профитните маржи во трговските ланци, што ќе резултира со пониски трошоци за околу 3,000 производи.
Според неговите зборови, овие профитни разлики сега достигнуваат и до 45,2 проценти во најголемите синџири, и во текот на следниот период до крајот на годината ќе следуваат сеопфатни чекори за подобрување на животниот стандард на жителите во Србија. Тој исто така најави и намалување на каматните стапки на готовинските и потрошувачките кредити.
Вучиќ на прес-конференција изјави дека во наредниот период ќе бидат донесени закони за трговија и заштита на купувачите, додека до крајот на годината се очекува усвојување на законот за забрана на нелојална трговска пракса. Дел од чекорите тој ги презентираше денес, а дел ќе бидат дополнително презентирани во средината на септември.
Профитните маржи ќе бидат лимитирани за 23 групи производи, односно приближно 3,000 производи, што се однесува на 24 компании. Опфатени се 24 трговци на мало. „Во наредниот период ќе донесеме закон за трговија, ќе донесеме закон за заштита на потрошувачите, каде што ќе мора да има ценовници, нема да има измами со таканаречени промоции. А, до крајот на годината ќе донесеме и закон за спречување на нефер трговски практики, каде што им помагаме на домашните бизнисмени, на нашите добавувачи“, рече Вучиќ на денешната прес-конференција во Белград.
Вучиќ објави дека регулативата за ограничување на профитните разлики „ќе започне следната недела“. Тој нагласи дека речиси и да нема да има злоупотреби, бидејќи се е обезбедено преку регулативата, преку директна контрола и пазарна инспекција, преку сите финансиски и даночни инспекции. „Казните ќе бидат исклучително строги, но веќе разговаравме со трговците и ќе се погрижиме добро да го разберат тоа. Сакаме тие да остварат поголем профит и веруваме дека тоа е во нивен интерес, бидејќи луѓето ќе купуваат повеќе и ќе трошат повеќе пари, бидејќи знаат дека не плаќаат за нешто што е прескапо“, рече Вучиќ. Тој додаде дека верува оти тоа е многу важно и дека е уверен дека луѓето ќе бидат исклучително задоволни бидејќи секој од производите ќе биде значително поевтин. Како што потенцираше, за секој производ највисоката профитна разлика ќе биде 20 проценти, а максималниот „оф-рабат“ ќе биде 10 проценти.
„Се обидуваме да постигнеме ограничување на маржите што ќе придонесе за големо намалување на цените, вклучени се околу 3,000 производи. За да се види зошто стандардот е повисок во ЕУ – од 13 до 15 проценти оди во просечната потрошувачка кошничка, толку оди за храна. Во нашиот случај, оди помеѓу 40,6 и 47,8 проценти, во минималната потрошувачка кошничка, толку оди за храна, а потоа малку пари остануваат за луѓето за други потреби“, рече Вучиќ.
Српскиот претседател најави намалување на цените на сапун, паста за заби, детергенти, пелени за бебиња и возрасни, ориз, безалкохолни пијалоци, солени кондиторски производи, зеленчук и овошје, замрзнати производи, оцет, тестенини, млечни производи, јајца.
„Србија има стабилен девизен курс веќе 13 години, тоа никогаш не било случај. Србија има ниска стапка на јавен долг, некаде околу 45 проценти, сите тие бројки се добри. Таму каде што ние, признавам, направивме грешка, поради разни проблеми, не обрнав доволно внимание на одредени работи што излегоа од контрола“, рече Вучиќ. Според него, неговата грешка била кога имало две претходни акции за намалување на цените, кои не биле ограничувања на профитните маржи за сите производи.
Во врска со каматните стапки на кредитите, претседателот на Србија рече дека целта е да се поттикне дополнителна потрошувачка. „Стапката на сиромаштија во Србија е најниска, но сè уште има луѓе кои се сиромашни, секоја година тој број се намалува. Но, ова се однесува на средната класа. Просечната плата во мај била 107,500 динари, медијалната плата е 83,525 динари. Околу 50 проценти од граѓаните примаат плата што е помала од 83,525 динари, имаме голем број граѓани кои имаат големи плати од над 100,000 динари. значајна стратификација, сакаме да им помогнеме на средната класа“, рече тој. Тој тврди дека тие мерки досега „не се видени во историјата на Србија“.
„Граѓаните и пензионерите со пензија до 100,000 динари можат да земат готовински кредити до 9,000 евра. Со ваков вид пензија и плата, до вчера каматната стапка на динарските кредити беше до 11,35. Сега им кажуваме – не смее да надмине 7,5 проценти. Поштенска штедилница ќе ја намали на 5,99“, нагласи Вучиќ.
Беа објавени и измени на Законот за извршување и обезбедување (ЗИО), според кои конфискацијата на недвижен имот ќе биде невозможна, ако станува збор за единствен семеен недвижен имот, ако живеалиштето на таа адреса е регистрирано најмалку пет години пред поднесувањето на предлогот за извршување, како и ако станува збор за стан со површина до 60 квадратни метри. Претставувајќи нов пакет економски мерки за подобрување на животниот стандард на граѓаните, тој додаде дека ќе има одредени услови, како што е постоењето на судска одлука дека станува збор за едносемејна куќа, и дека новата регулатива ќе содржи „уште некои бенефиции за должниците на извршување“.
зш/ . Извор: МИА
