Table of Contents
Гинеколог открива како правилната исхрана за време на секоја фаза од менструалниот циклус може да ги ублажи симптомите, да го зајакне телото и да ја подобри хормонската рамнотежа
Промени во расположението, подување и желба за храна – ако ова ви звучи познато, знаете дека тоа се несаканите последици од менструалниот циклус. Секој месец вашето тело поминува низ четири различни фази: менструална, фоликуларна, овулациска и лутеална, а секоја од нив се карактеризира со единствени хормонски промени.
Во текот на секоја фаза, хормоните драматично варираат и влијаат врз расположението, нивото на енергија, апетитот, варењето, па дури и врз тоа како телото ги обработува хранливите материи. Меѓутоа, можете да ја приспособите исхраната на вашиот циклус за да ги поддржите хормоните, енергијата и општата благосостојба.
Иако циклусот на секоја жена е единствен, типичниот менструален циклус трае помеѓу 21 и 35 дена, додека просекот е околу 29 дена. Секоја фаза носи свои физиолошки промени, кои честопати може да бидат исцрпувачки. Но ако ги синхронизирате циклусот и исхраната, можете значително да ги ублажите симптомите.
Усогласувањето на исхраната со фазите на менструалниот циклус може да биде пресвртница за здравјето. Еве како да го постигнете тоа:
Менструална фаза
Првата фаза започнува на првиот ден од крвавењето и трае околу пет дена во просек. Естрогенот и прогестеронот тогаш се на најниско ниво, па може да се чувствувате исцрпено и уморно. Губењето крв може да доведе до намалување на нивоата на железо.
Што да јадете:
- Храна богата со железо: спанаќ, леќа, цвекло, црвено месо, урми
- Хидратација: вода, растителни чаеви, кокосова вода
- Антивоспалителни состојки: ѓумбирот и куркумата помагаат за грчеви
Фоликуларна фаза
Започнува на шестиот ден од циклусот и трае до овулацијата. Тогаш телото произведува повеќе естроген, па веројатно се чувствувате поенергично и помотивирано – ова е идеален период за регенерација.
Што да јадете:
Поврзани објави
- Сложени јаглехидрати: киноа, овес, сладок компир, интегрални житарки
- Немасни протеини: пилешко месо, тофу, јајца, мешунки
- Омега-3 масни киселини: чиа семе, лен, ореви
Овулациска фаза
Овулацијата обично се случува на 14-тиот ден од циклусот и трае 1-2 дена. Естрогенот тогаш го достигнува врвот, па многу жени се чувствуваат најдобро во овој период.
Што да јадете:
- Цинк и селен: семе од тиква, остриги, бразилски ореви
- Витамин Е: бадеми, семки од сончоглед, авокадо
- Антиоксиданси: боровинки, малини, зелен листест зеленчук
Лутеална фаза
Започнува веднаш по овулацијата. Прогестеронот расте за да се подготви телото за потенцијална бременост. Ако не дојде до оплодување, хормоните опаѓаат и се појавуваат симптомите на ПМС.
Што да јадете:
- Магнезиум: темно чоколадо, банани, спанаќ
- Витамин Б6: леблебија, лосос, ф’стаци
- Влакна: интегрални житарки, јаболка, мешунки
Исхраната усогласена со фазите на менструалниот циклус може значително да ја намали непријатноста, да ја зголеми енергијата и да го подобри општото здравје. Ако имате изразени хормонски проблеми, задолжително советувајте се со нутриционист или ендокринолог за да добиете индивидуализиран план на исхрана.
ФОТО: Freepik
