Администрацијата на американскиот претседател Доналд Трамп му даде директива на Пентагон да подготви алтернативи за употреба на армијата против нарко-картелите, кои претходно во текот на годинава беа декларирани како терористички организации, потврдија американски функционери.
Во февруари, Трамповата администрација ги етикетираше нарко-картелите, вклучувајќи ги „Трејн де Арагва“ и „Синалоа картелот“, како глобални терористички организации, во рамки на засилената борба против нелегалната миграција и криминалните групи поврзани со трговија со дрога.
Државниот секретар на САД, Марко Рубио, порано изјави дека ваквата класификација сега овозможува употреба на воени и разузнавачки ресурси против тие организации.
Мексиканската претседателка Клаудија Шајнбаум Пардо денеска изјави дека членови на американската војска нема да стапнат на мексиканска територија. „САД нема да дојдат во Мексико со војската. Соработуваме, но нема да има инвазија, тоа е апсолутно исклучено. Тоа не е дел од никаков договор, далеку од тоа“, изјави Клаудија Шајнбаум.
