Искуството на човекот кој поминал 178 дена во вселената носи важна порака за човештвото
Рон Гаран, поранешен астронаут на НАСА, поминал вкупно 178 дена во вселената во текот на својата кариера – во американски спејс-шатл, во руското летало „Сојуз“ и на Меѓународната вселенска станица. Денес, со дистанцата што му ја дала вселената, вели дека доживеал силно отрезнување и сфатил дека живееме во лага.
Овој астронаут, пилот на воен авион и претприемач признал дека додека ја набљудувал планетата од орбитата, го погодило спознание што му го променило погледот кон светот.
„Сфатив дека живееме во лага“
„Ја видов биосферата како се прелева во боите на виножитото и се здружува со животот. Не видов економија, но откако системите што ги креирал човекот третираат буквално сè, вклучувајќи ги и самите системи за одржување на животот на нашата планета, како подружница на глобалната економија, јасно е дека од таа точка во која исчезнува Земјата, а започнува вселената, живееме во лага“, рекол Гаран во интервју за Big Think.
По враќањето на Земјата, неговата перцепција веќе не била иста. За искуството што го променило неговиот поглед кон човештвото, Гаран зборува низ призмата на феноменот познат како „ефект на прегледот“.
„’Ефектот на прегледот’ ја опишува промената што ја доживуваат астронаутите кога ќе ја видат планетата како левитира во темнината на вселената. Како да ни се вклучува сијаличка и сфаќаме колку сме сите меѓусебно поврзани и зависни“, објаснил тој и додал:
„Човештвото лебди во мрак, ние гледаме само мал приказ на реалноста.“
Поврзани објави
„Плаќаме висока цена како цивилизација“
Според неговите зборови, еден од клучните проблеми со кои се соочува светот е тоа што луѓето не ја согледуваат целата слика.
„Мислиме дека ја знаеме целата слика, додека во реалноста гледаме само мал приказ. Со оглед на тоа што не ја гледаме реалната слика, не сме во состојба да решиме многу од проблемите со кои се соочуваме. Како цивилизација, моментално плаќаме висока цена поради тоа. Дел од причината зошто не ги решаваме проблемите е тоа што ја немаме вистинската перспектива. Тоа е една од причините зошто мора да излеземе од мракот“, рекол Гаран.
Инспириран од сопственото искуство, го развил концептот „орбитална перспектива“, кој го нарекол „повик за акција“.
„Тоа е неправдата што ја гледаме кога ќе го согледаме отрезнувачкиот контраст помеѓу неверојатната убавина на нашата планета и несреќната реалност на животот на истата таа планета за значаен број жители“, потенцирал.
Наместо да го набљудуваме светот низ призмата на економијата и општествените системи, Гаран апелира да го промениме аголот на гледање и да се запрашаме: што му користи на целото човештво? Дури откако ќе ја добиеме таа проширена перспектива, ќе можеме да ги менуваме работите на подобро.
ФОТО: NASA / Unsplash
