Table of Contents
Шетањето се препорачува само во раните утрински часови и приквечер
Кога надвор ќе стане жешко, никому не му е лесно, особено не на трудниците. Тежина во нозете, отечени стапала и вртоглавица се само некои од типичните летни тешкотии. Затоа, споделуваме неколку корисни совети за идните мајки…
Пијте многу течности
Најдобриот начин да го намалите отекувањето на рацете и нозете е да ја зголемите количината на течности. Штом се разбудите, испијте чаша вода на празен стомак, а во текот на денот пијте по најмалку две литри. Покрај вода, пијте и природни сокови од овошје и зеленчук, бидејќи добро ја гасат жедта и полни се со витамини. Чајот од пченкарна свила е одличен против задржувањето вода во организмот.
Пливајте
Важно е да се освежите, да се ослободите од чувството на тежина во нозете и болките во грбот. Додека пливате, водата го масира телото, ја поттикнува циркулацијата и го подобрува дишењето. Секако, не смеете да претерувате со пливање, ниту со времето поминато во вода, но нема да ви пречи ако испливате 50 метри.
Спијте многу
Секому му треба одмор, особено на трудниците. Ако не успеете да отспиете најмалку осум часа навечер, надоместете го тоа во текот на денот.
Шетајте
Се препорачува лесна прошетка, но само во раните утрински часови и приквечер. Во текот на денот, кога сонцето е јако, трудниците треба да седат под сенка. Ако сте на море, немојте да лежите на сонце, дури ни под чадор, туку скријте се под дебела ладовина.
Одморајте ги нозете
Поврзани објави
Неколку пати дневно правете го следново: легнете на под, а нозете подигнете ги на ѕид. По пет минути ќе почувствувате како исчезнува тежината во нозете.
Носете памучна долна облека
Кога надвор е топло, потењето во подрачјето на гениталиите се зголемува, па доаѓа до проблеми како јадеж, засилен вагинален секрет и пецкање. Задолжително носете гаќички од чист памук, бидејќи тој пропушта воздух и ја впива потта. Веднаш соблекувајте го мокриот костим за капење и облекувајте сув.
Внимавајте на исхраната
За време на жештините се препорачува лесна храна и што повеќе овошје и зеленчук. Јадете малку, но често.
Одморајте ги стапалата
Ако навечер стапалата ви се отечени и болни, подгответе им бања: во ладна вода ставете лажица-две морска сол и малку чај од рузмарин, а потоа потопете ги нозете неколку минути.
Извадете ги прстените
Прстените може да бидат голем проблем ако ви отечат прстите. А за време на големите жештини, додека сте бремени – најверојатно ќе отечат. Затоа, најдобро е да ги извадите.
ФОТО: luiz gustavo / Unsplash
