Белорускиот претседател Александар Лукашенко го именува Александар Турчин за нов премиер на земјата, пренесуваат медиумите повикувајќи се на државната новинска агенција Белта. Турчин, кој претходно беше шеф на регионалниот извршен комитет на Минск, има долгогодишно искуство на важни владини позиции, вклучувајќи ја позицијата на шеф на Кабинетот на Советот на министри во 2016 година и прв вицепремиер во периодот 2018-2019 година. Европската унија воведе санкции против него на 17 декември 2020 година, а Албанија, Исланд, Лихтенштајн, Црна Гора, Северна Македонија, Норвешка и Швајцарија се приклучија на овие санкции.
Нему му е забранет и влез во Обединетото Кралство од 18 февруари 2021 година. По неговото именување, Турчин им изјави на новинарите дека Белорусија не планира да направи значајни промени во својот курс, додавајќи дека неговиот пристап ќе биде „еволуција без револуции“. Турчин ќе го замени Роман Головченко, кој беше премиер од јуни 2020 година, а сега е назначен за шеф на Народната банка. Лукашенко ги претстави кадровските промени како доаѓање на „нова генерација“ во белоруското раководство. Лукашенко, кој е на власт од 1994 година и се смета за близок соработник на рускиот претседател Владимир Путин, постојано се соочува со обвинувања за изборна измама.
