Table of Contents
Подобар сон, повеќе енергија и подобра функција на црниот дроб – откажувањето од алкохол може да донесе низа позитивни промени, од кои некои се забележуваат уште во првата недела.
Престанувањето со консумирање алкохол не значи само избегнување мамурлак, туку може да има позитивно влијание врз целокупното здравје. Одредени промени почнуваат да се случуваат по само 24 часа, додека други стануваат позабележителни по еден месец.
По 24 часа: Телото почнува да се опоравува
Вообичаено, алкохолот се елиминира од организмот во рок од околу 24 часа, по што може да започне нормализирањето на нивото на шеќер во крвта. Сепак, кај луѓето што редовно пијат може да се појават симптоми на апстиненција, како нарушен сон, промени во расположението, потење и тресење.
Според професорката Никол Ли од Универзитетот „Кертин“, овие симптоми кај многумина се намалуваат во текот на првата недела. Важно е да се знае дека кај лицата со зависност од алкохол наглото прекинување може да биде опасно и бара медицински надзор.
По една недела: Подобар сон и повеќе енергија
Иако алкохолот може да предизвика поспаност, тој го нарушува квалитетот на сонот. По седум дена без пијалак, многумина може да забележат подобар одмор, повеќе енергија и подобро расположение.
Поврзани објави
Алкохолот може да предизвика воспалителни процеси во мозокот, кои се поврзуваат со раздразливост, потиштеност и губење интерес за секојдневните активности. Воедно, црниот дроб почнува да се опоравува. Кај луѓето со поблаги оштетувања, веќе по една недела може да се намали насобраната маст во црниот дроб.
По еден месец: Промени во тежината и метаболизмот
По четири недели без алкохол може да се забележат и позначајни промени. Истражување во кое биле споредени лица што пиеле околу 31 единица алкохол неделно со оние што апстинирале покажало подобра чувствителност на инсулин, понизок крвен притисок и намалување на телесната тежина кај групата што не пиела.
Забележани биле и пониски нивоа на одредени фактори на раст поврзани со ракот. Дополнително, намалувањето на алкохолот може да придонесе за подобра хидратација, што позитивно се одразува и врз изгледот на кожата.
Престанувањето со алкохол не носи исти промени кај сите, бидејќи резултатите зависат од претходните навики и здравствената состојба. Сепак, и привремената апстиненција може да биде можност да се забележи како организмот реагира без алкохол.
Фото: pixabay.com
