Во Крушевац е пронајдено телото на Дејан Фазлија (25), млад човек кој искрварил до смрт откако татко му го избодел со нож. Телото на несреќното момче го пронашла полицијата, а од обвинителството соопштија дека Дејан се здобил со убодна рана во пределот на градниот кош и срцевиот мускул. Всушност, таткото си го убил сопствениот син прободувајќи му нож во срце! – пишуваат српските медиуми. Кратко откако било пронајдено телото на Дејан, неговиот татко се обесил во куќата во која некогаш живеел со семејството. На убиството и самоубиството му претходела кавга меѓу таткото и синот, која, како што се претпоставува, била поттикната од дејство на алкохол, како и многупати досега. Имено, таткото на Дејан бил склон кон алкохол, поради што семејството често страдало.
На почетокот на семејната драма ниту семејството не знаело што се случило со Дејан. Во една од групите на Фејсбук, заедно со фотографија од насмеаниот Дејан, беше споделена објава со следнава содржина:
„На брат ми му се губи секаква трага од 26.08. од 23.00 часот. Доколку некој го познава или го види контактирајте нè на бројот ******** или повикајте полиција во Крушевац. Би ги замолил нашите крушевчани доколку дознаат нешто, нека ни кажат. Споделувајте го овој пост колку што е можно повеќе – стои во постот објавен по исчезнувањето на несреќното момче.
За жал, само еден ден подоцна стигна веста дека Дејан е пронајден мртов во локва крв. Веста го шокираше не само Крушевац, туку и цела Србија, која жали за прераниот и суров крај на животот на младиот човек. – Секогаш беше насмеан и весел, и покрај тоа што татко му постојано го навредуваше и малтретираше, и покрај ужасното тешкото детство – напиша еден корисник на социјалната мрежа „Х“ (поранешен „Твитер“), споделувајќи слика од насмеаниот млад човек.
Детали од животот на Дејан, како и од животот на неговото семејство, потоа се појавија на интернет. Соседите на семејството Фазли наведуваат дека таткото на Дејан, поради склоноста кон алкохол, секогаш бил насилен, најчесто кон сопругата. Бидејќи браќата на Дејан рано ги основале своите семејства и си го започнале сопствениот живот, во куќата останале само Дејан и неговите родители.
Мајката на Дејан пред три месеци заминала во Австрија да го чува внукот. Сопругот убиец ѝ испраќал пораки секој ден и ѝ се заканувал дека ќе ја убие штом ќе ја добие нејзината адреса. Од друга страна, бидејќи немал адреса во Виена каде што привремено престојува сопругата, вршел притисок врз Дејан да дознае каде е неговата мајка. Но и Дејан некое време живеел на друга адреса.
Во тоа му помогнале колегите од работа, а работел две работи за да собере пари за лекување на мајка си. Имено, неговата мајка имала офталмолошки проблеми, па Дејан собрал пари за да се осигура дека ќе оди на операција. Како што соопштија од Обвинителството, на 27 август во вечерните часови во Полициската управа во Крушевац официјално било пријавено исчезнувањето на Д.Ф. од страна на неговата мајка Н.Ф. (52).
