Во повеќе делови од државата попладнево е регистрирано силно невреме проследено со пороен дожд, грмежи и засилен ветер. Нестабилната временска маса се движи од југозапад кон североисток и зафаќа поголем дел од територијата на Македонија.
Невремето во моментов е активно и во Скопје, каде граѓаните сведочат на интензивни врнежи и темни облаци над градот.
Од Управата за хидрометеоролошки работи информираат дека најпогодени се југозападните и централните региони, каде локално има пообилни врнежи, електрични празнења и повремено силни налети на ветер.
Метеоролозите предупредуваат дека и во текот на утрешниот ден времето ќе биде нестабилно, со услови за поинтензивно невреме, обилен дожд и можна појава на град во одделни делови од земјата.
За недела се најавува засилен северен ветер и постепено намалување на температурите.
