Table of Contents
Познатиот блогер и пионер на интернет-озборувањата Перез Хилтон е во болница по сериозен инцидент во својот дом. Неговото семејство потврди дека е во тешка, но стабилна состојба, а сега е фокусиран на физичкото и психичкото закрепнување.
Животот на Перез Хилтон, едно од најпознатите имиња во светот на интернет-шоубизнисот, во последните денови доби драматичен пресврт.
Познатиот блогер, чие вистинско име е Марио Арманд Лавандира Помладиот, на 4 август бил пренесен во болница по сериозен инцидент во својот дом во Мајами-Дејд.
Според полицискиот извештај до кој дошле американските медиуми, неговата сестра Барбара Лавандира го пронашла во тешка состојба во бањата и веднаш повикала итна помош.
Сестрата избегала со неговите деца и повикала помош
По она што го затекнала во домот, Барбара ги зела трите деца на Перез и излегла од куќата, а потоа повикала итна медицинска помош.
Според извештајот, Перез во еден момент излегол од домот и удрил по прозорецот од нејзиниот автомобил, по што повторно се вратил внатре.
Кога пристигнале полициските службеници, тој веќе бил во куќата, а влезот бил заклучен. Полицијата на крајот влегла во домот со помош на членовите на семејството.
На местото на настанот му била укажана медицинска помош поради повеќекратни повреди и предозирање, по што бил пренесен во болница.
Хоспитализиран е според „Baker Act“
Перез Хилтон бил задржан на лекување според таканаречениот „Baker Act“ на Флорида, законска процедура која овозможува лицето да биде задржано за психијатриска процена и третман кога постои сериозна опасност да се повреди себеси или другите.
Неколку дена подоцна, неговото семејство објави соопштение во кое потврди дека тој е во тешка, но стабилна состојба.
Според семејството, претрпел значителна загуба на крв и дополнителни повреди поради кои му е потребна операција.
На 15 август било потврдено дека Хилтон ќе биде опериран, но семејството не открило детали за медицинската процедура.
„Пред него е долг пат“
Неговата сестра Барбара во разговорот со американски медиуми откри дека Перез сè уште се наоѓа во болница и добива медицинска помош.
Таа нагласи дека во моментов тој нема пристап до мобилен телефон, интернет или социјалните мрежи.
Пред него е долг пат, и физички и психички“, порачала Барбара, нагласувајќи дека семејството ги следи советите на лекарите и не сака да поставува рокови за неговото враќање дома.
Приоритет, според неа, е да го добие целиот третман што му е потребен и закрепнувањето да не биде забрзувано.
Семејството привремено презема грижа за трите деца
Во центарот на вниманието сега се и трите деца на познатиот блогер – Марија (13), Миа (11) и Мајте (8).
Хилтон е самохран татко, а сите три деца ги добил со помош на сурогат-мајчинство.
Неговата сестра и мајка не бараат трајно старателство над децата. Наместо тоа, побарале привремено правно решение со кое мајката на Хилтон би можела да носи неопходни одлуки за децата додека тој се лекува.
Поврзани објави
Според документите цитирани во американските медиуми, Хилтон доброволно се согласил на привремениот аранжман.
Семејството открило дека проблемите траеле подолго
Особено загрижувачки се информациите дека актуелната криза не дошла ненадејно.
Според полицискиот извештај, Барбара им кажала на надлежните дека нејзиниот брат имал сериозни психички тешкотии уште една недела пред инцидентот и дека семејството тогаш го одвело на лекување.
Во разговор со медиумите таа открила и дека Хилтон претходно им кажал оти се чувствувал празно, безнадежно и како да претставува товар за другите.
Токму поради тоа, семејството сега се обидува целото внимание да го насочи кон неговото лекување и закрепнување.
Пријателите бараат јавноста да се повлече
Во меѓувреме, дел од неговите блиски пријатели јавно апелираа семејството и медиумите да не ги откриваат сите детали од неговата здравствена состојба.
Тие не го оспоруваат тешкото искуство низ кое минала Барбара, но сметаат дека Перез и неговите деца заслужуваат приватност.
Не можете да барате приватност од јавноста, а истовремено да зборувате за најболниот и најинтимниот момент во животот на Перез“, порачал еден негов пријател.
Според нив, на трите деца особено не им е потребно дополнително медиумско внимание во овој период.
Кога брендот станува семеен товар
Хилтон со години го градел своето име токму преку јавноста.
Беше еден од пионерите на интернет-озборувањата и во првата деценија од 21 век стана едно од највлијателните, најчитаните, но и најконтроверзните имиња во светот на онлајн-шоубизнисот.
Неговата страница и денес е дел од неговиот бизнис, а според неговите пријатели, посетеноста значително се зголемила по веста за инцидентот.
Токму тоа отвора уште едно непријатно прашање: каде завршува јавниот интерес, а каде почнува туѓата приватност – особено кога станува збор за тешка семејна и здравствена криза?
За неговите блиски, одговорот во моментов е едноставен: камерите и насловите треба да се тргнат настрана, а фокусот да биде ставен на Перез, неговото закрепнување и неговите три деца.
Фото: Инстаграм
