Американската Федерална комисија за комуникации (FCC) објави дека одобрила барање од компанијата SpaceX за поставување на уште 7.500 сателити од втора генерација во орбитата, со цел унапредување на глобалните интернет-услуги.
Со ова одобрение, SpaceX, компанијата на Илон Маск, ќе може да управува со дополнителни 7.500 сателити од втора генерација, со што вкупниот број на одобрени сателити на светско ниво достигнува 15.000.
FCC воедно му дозволи на SpaceX да ги модернизира сателитите и да работи на пет фреквенциски опсези, откажувајќи дел од претходните ограничувања кои спречуваа преклопување на покриеноста и зголемување на капацитетот.
Комисијата информира дека дополнителните сателити ќе овозможат директно поврзување со мобилни уреди надвор од САД, како и проширена покриеност во земјата, што ќе донесе мобилни услуги од следната генерација и интернет-брзини до 1 гигабит во секунда.
„Ова одобрение од FCC е значаен чекор кон обезбедување услуги од нова генерација“, изјави претседателот на FCC, Брендан Кар. „Со дозволата за 15.000 нови и напредни сателити, FCC му даде зелено светло на SpaceX да обезбеди неспоредливи сателитски широкопојасни капацитети, да ја засили конкуренцијата и да помогне ниту една заедница да не биде оставена настрана.“
SpaceX побара дозвола за распоредување на речиси 30.000 сателити, но FCC објави дека засега одобрува само 15.000.
„Сметаме дека одобрувањето на дополнителни сателити е во јавен интерес, иако сателитите Старлинк од втора генерација сѐ уште не се тестирани во орбитата. Дозволата за преостанатите 14.988 предложени сателити, вклучително и оние планирани за работа на височина над 600 километри, засега се одложува“, се наведува во соопштението на FCC.
Комисијата нагласи дека SpaceX мора да лансира најмалку 50 проценти од максималниот број одобрени сателити од втора генерација, да ги распореди во доделените орбити и да започне со нивната оперативна употреба најдоцна до 1 декември 2028 година, додека преостанатите мора да бидат лансирани до декември 2031 година. Компанијата, исто така, треба да го заврши распоредувањето на 7.500 сателити од првата генерација до крајот на ноември 2027 година.
Минатата недела, Старлинк најави дека во текот на 2026 година ќе започне со реконфигурација на својата сателитска мрежа, при што сите сателити кои орбитираат на висина од околу 550 километри ќе бидат спуштени на 480 километри, со цел подобрување на безбедноста во вселената.
Во декември, Старлинк објави дека еден од неговите сателити доживеал технички проблем во вселената, што довело до „мала“ количина вселенски отпад и прекин на комуникацијата со леталото на висина од 418 километри – редок инцидент од кинетички карактер во орбитата за овој гигант на сателитскиот интернет.
SpaceX, преку Старлинк, стана најголемиот светски сателитски оператор, со мрежа од околу 9.400 сателити кои обезбедуваат широкопојасен интернет за потрошувачи, владини и деловни клиенти.
Поранешната претседателка на FCC, Џесика Розенворсел, во 2024 година повика на поголема конкуренција за Старлинк, истакнувајќи дека оваа мрежа тогаш контролирала речиси две третини од сите активни сателити.
