Пригответе совршени цимет-ролнички со воздушесто тесто и богат фил од цимет
Ако сакате меко, ароматично тесто и богат фил од цимет, овие домашни ролнички се вистинскиот избор. Тестото е воздушесто и меко, филот е ароматичен, а кремливата глазура од крем-сирење им дава совршена завршница.
Состојки:
За тестото:
- 500 г брашно
- 75 г шеќер
- 1 кесичка сув квасец
- ½ лажиче сол
- 1 јајце
- 200 мл топло млеко
- 75 г стопен путер
За филот:
- 100 г стопен путер
- 150 г кафеав шеќер
- 2-3 кесички цимет
За глазурата:
- 150 г крем-сирење
- 60 г шеќер во прав
- малку млеко или павлака
Поврзани објави
Приготвување:
Во поголема чинија измешајте брашно, шеќер, сув квасец и сол. Додајте јајце, топло млеко и стопен путер, па замесете мазно и меко тесто. Покријте ја чинијата и оставете го тестото на топло место околу 1 час, односно додека се удвои.
Во меѓувреме, измешајте кафеав шеќер и цимет. Стопете путер и оставете го кратко да се олади.
Нараснатото тесто префрлете го на набрашнета работна површина и расучете го во правоаголник. Премачкајте го со стопен путер, а потоа рамномерно посипете го со мешавина од кафеав шеќер и цимет.
Тестото внимателно завиткајте го во цврста ролна. Пресечете ја на еднакви делови со дебелина од 3-4 см.
Наредете ги ролничките во плех обложен со хартија за печење, оставајќи малку простор помеѓу нив. Покријте ги и оставете ги уште 20 минути да нараснат.
Печете ги во претходно загреана рерна на 200 степени околу 20 минути, односно додека ролничките добијат убава, златнокафена боја.
За глазурата, измешајте крем-сирење со шеќер во прав. Додавајте малку млеко или павлака постепено, додека добиете мазна и кремлива глазура.
Нанесете ја глазурата преку топлите цимет-ролнички и послужете ги додека се меки и ароматични. Најубави се свежи, додека средината е уште топла и сочна.
